Japonıada ótip jatqan Azıa oıyndarynda erler voleıbol quramasy 9–12 oryndar úshin machta Qytaı Taıbeıi komandasynan 1:3 esebimen jeńildi, dep habarlaıdy infohub.kz saıty.
Birinshi partıany qazaqstandyqtar sátsiz ótkizip, 11:25 esebimen utyldy. Alaıda ekinshi setti Sergeı Trıkoz shákirtteri senimdi oınap, 25:23 esebimen jeńip aldy. Biraq keshegi Gonkongpen oıynnan ózgeshe, oıyn barysyn ózgerte almady.
Qazaqstan quramasy sapynda Vladıslav Mastıhın 16 upaı jınady, Vladıslav Kýnchenko — 11, Azamat Seılhanov — 10.
AZIA OIYNDARY-2026. Voleıbol. Erler. 2 qazan. 9–12 oryndar úshin mach.
QAZAQSTAN – QYTAI TAIBEIİ 1:3 (11:25, 25:23, 21:25, 20:25).
Jeńiliske ushyraǵan soń, quramamyz sońǵy machta Azıadanyń 11-orny úshin Vetnammen nemese Indonezıamen talasady.
Azıa oıyndarynda erler voleıbol týrnıri 1958 jyldan beri ótkizilip keledi. Ony jıirek japondyqtar jeńip alǵan. Qazaqstan quramasy júldegerler qataryna eshqashan kirmegen.
XX Jazǵy Azıa oıyndary resmı túrde 19 qyrkúıekte ashylyp, 4 qazanda aıaqtalady. 45 eldiń sportshylary qatysatyn jarystarda 460 komplekt medal sarapqa salynýda. Azıada-2026-da Qazaqstan quramasy sapynda 35 sport túrinen 558 sportshy synǵa túsýde.
Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sýltanova men Alekseı Lýsenko, sondaı-aq karatıster Jolaman Bıgabyl men Sofá Berýlseva. Qurama qorjynyna besinshi altyndy MMA sheberi Erkinǵalı Búrkitalın saldy. Altynshyny — onyń aralas jekpe-jek komandasyndaǵy joldasy Qadyrbek Shynbaev. 23 qyrkúıekte Lýsenko AI-2026-nyń eki dúrkin chempıony atandy. Segizinshi joǵary dárejeli medaldi 24 qyrkúıekte erler arasyndaǵy jup eskekti qaıyqtar jarysynda Vladıslav Iakovlev pen Ivan Chernýhın jeńip aldy. Toǵyzynshy altyn medaldi 27 qyrkúıekte shpaga sheberleri komandasy ıelendi. Búgin boksshy Tórehan Sabyrhan onynshy altyndy jeńip aldy.
Oıyndardyń 12 kúninen keıin Qazaqstan beıresmı medal esebinde toǵyzynshy orynda tur.