Qytaılyq Voyah Passion S elektr krosoveri Ýhandaǵy jabyq tonnelde 360 gradýstyq «ólim ilmegin» oryndap, 16 jyl buryn Mıhael Shýmahermen baılanystyrylǵan Mercedes-Benz SLS AMG-diń áıgili jarnamalyq trúgin qaıtalady, dep habarlaıdy infohub.kz saıty.
Trúk úshin serıalyq Voyah Passion S paıdalanyldy, onyń konstrýksıasy jeńildetilmegen jáne eshqandaı ózgeris engizilmegen. Avtokólik standartty batareıasyn jáne ıntellektýaldy júrgizý júıeleriniń tolyq jıyntyǵyn saqtap qaldy.
Mashınanyń tonnel betinen syrǵyp ketpeýi úshin ol shamamen 130 km/saǵ jyldamdyqqa jetip, 16 gradýs buryshpen burylysqa enýi qajet boldy. Negizgi faktor jyldamdyq boldy: Voyah kompanıasynyń aıtýynsha, jyldamdyqtyń nebári 3–5 km/saǵ tómendeýi ilinistiń joǵalýyna jáne krosoverdiń qulaýyna ákelýi múmkin edi.
Mercedes-Benz SLS AMG sportkarynan aıyrmashylyǵy, qytaılyq elektromobıl áldeqaıda úlken ári aýyr. Onyń ústine, ol eki elektr qozǵaltqyshyn jáne tolyq jetekti paıdalanady, olar birge 637 at kúshi men 765 Nm aınalý momentin beredi.
Qytaılyq kompanıa bul zaezdti Mercedes-Benz-tiń ataqty rolıgine qurmet kórsetý dep tikeleı ataıdy. Onda Mıhael Shýmaher SLS AMG-de osyndaı trúk oryndaǵan delingen, biraq sol kezdiń ózinde rúlde aty ańyzǵa aınalǵan gonshık otyrǵany týraly daýlar týyndaǵan edi.
Endi Voyah trúkti serıalyq elektrkólikte qaıtalady. Kompanıanyń málimdeýinshe, vıdeo arnaıy effektilersiz túsirilgen.
Voyah Passion S Qytaı naryǵyna shyǵýǵa daıyndalyp jatyr. Modelge aldyn ala tapsyrystar qazirdiń ózinde ashyq, al eń joǵary nusqasy 310 myń ıýán (shamamen 21,4 mln teńge) turady. Resmı tusaýy 15 tamyzǵa josparlanǵan.
Buǵan deıin Kýrsıv Avto Voyah kompanıasy krosoverdi 20 metrlik sekirispen ushyrýyn kórsetkenin aıtqan bolatyn.