Wetherspoons pabtar jelisi tutynýshylardyń mýzyka qoıýyna nemese daýys zoraıtqyshpen telefon arqyly sóılesýine tyıym saldy. Bul sheshim shý týraly shaǵymdardyń artýyna baılanysty qabyldandy. Kompanıa 792 pabtyń barlyǵynda tyıym engizilgenin habarlady. Smartfondar men planshetterden shyǵatyn dybystar «sońǵy jyldary ózekti máselege aınalǵanyn» atap ótti.
Kompanıa málimdemesinde: «Basqalardyń vıdeolary men daýys zoraıtqyshtaǵy telefon sóılesýlerinen jalyqqan tutynýshylardyń shaǵymdarynan keıin Wetherspoon tutynýshylardy telefondaryn únsiz rejımge aýystyrýǵa nemese qulaqqap paıdalanýǵa shaqyrdy», — delingen.
Wetherspoons tóraǵasy ári negizin qalaýshy Tım Martın: «Basqalardyń mýzykasy men daýys zoraıtqysh dybystary ústemdik etetin álemde Wetherspoon pabtary — tynyshtyq pen oılanýdyń oazısi. Tutynýshylardyń dybys kakofonıasynan jalyqpaýy úshin biz telefon paıdalanýshylardy dybysty azaıtýdy suraımyz», — dedi.
Lıberal-demokrattar buǵan deıin avtobýs pen poıyzda daýys zoraıtqyshpen mýzyka tyńdaıtyn «qulaqqapsyz júrgenderge» 1000 fýntqa deıin aıyppul salýdy usynǵan bolatyn. Ótken jyly YouGov saýalnamasy boıynsha, adamdardyń 62%-y Lıberal-demokrattardyń bul bastamasyn qoldasa, 28%-y qarsy bolǵan. 6815 brıtandyq eresek adam qatysqan saýalnamada zeınetkerlerdiń tórtten úsh bóligi aıyppuldy qoldaǵan, al 18-24 jas aralyǵyndaǵylardyń pikiri 47-43 paıyzben ekige jarylǵan.
London meri Sadık Han ótken jyly qalanyń kólik júıesinde mýzyka tyńdaǵanda qulaqqap paıdalanýǵa shaqyratyn naýqan bastaǵan bolatyn. JD Wetherspoon alǵashqy pabyn 1979 jyly Soltústik Londondaǵy Masvell-Hıllde ashqan. Alǵashynda «Martin's Free House» dep atalǵan pab kelesi jyldyń basynda Wetherspoons dep ózgertildi.