Pavel Dýrov beınesi salynǵan kitaptar, kádesyılar jáne basqa da taýarlar Wildberries pen Ozon platformalarynan joıylýy múmkin. Marketpleıster Telegram negizin qalaýshynyń Reseıde terrorıster men ekstremıster tizimine engizilýine baılanysty assortımentterin teksere bastady. Bul týraly TASS habarlady, dep jazady infohub.kz.
RVB (Wildberries & Russ) birikken kompanıasynyń baspasóz qyzmeti mundaı taýarlardyń shekteýlerge jatatyn-jatpaıtynyn anyqtaý úshin ishki tergeý júrgizip jatqandyqtaryn málimdedi. Eger buzýshylyqtar rastalsa, Dýrovqa qatysty taýarlardyń kartochkalary buǵattalady.
Ozon Reseı zańnamasyna sáıkes áreket etetinin atap ótti. Adam nemese materıaldar terrorıster men ekstremıster tizimine engizilgennen keıin kompanıa assortımentti tekseredi jáne tıisti pozısıalardy joıady.
«Jaqyn arada Pavel Dýrovqa tikeleı qatysty taýarlar, onyń ishinde kitaptar men onyń beınesi bar ónimder bizdiń vıtrınadan jasyrylady», — dep habarlady marketpleıstiń baspasóz qyzmeti.
Buǵan deıin Rosfınmonıtorıng Pavel Dýrovty terrorıster men ekstremıster tizimine engizgen bolatyn. Oǵan deıin Reseıde ol terorıstik áreketke járdemdesýde aıyptalyp, halyqaralyq izdeý jarıalaý rásimi bastalǵan edi.
Reseı FSB-synyń málimetinshe, Telegram ákimshiligi vedomstvonyń aıtýynsha terorıstik jáne ózge de zańsyz áreketterdi daıyndaý men úılestirý úshin paıdalanylǵan arnalardy, chattar men bottardy joımaǵan. Roskomnadzor da buǵan deıin messendjer komandasyna 150 myńnan astam tyıym salynǵan kontentti joıý týraly talap jibergenin, alaıda olardyń oryndalmaǵanyn málimdegen.