24 shildege qaraǵan túni Sankt-Peterbýrg pen Tver oblysy ushqyshsyz ushaqtardyń jappaı shabýylyna ushyrady. Shabýyl saldarynan Wildberries nysandaryn qosa alǵanda, qoıma keshenderi zaqymdandy, dep habarlaıdy infohub.kz.
Lenıngrad oblysynyń ákimi Aleksandr Drozdenko óńir ústinen 50 ushqyshsyz ushaqtyń atyp túsirilgenin habarlady. Shabýyl qaýpine baılanysty «Pýlkovo» áýejaıy ýaqytsha jumysyn shektedi — áýe qaqpasy reısterdi qabyldamaı, jibermeı turdy.
«Ostorojno, novostı» Telegram-arnasynyń málimetinshe, shabýylǵa Wildberries qoımalarynyń biri ornalasqan «Ýtkına Zavod» ónerkásip aımaǵy ushyrady. Keıin kompanıanyń baspasóz qyzmeti Shýshary men Ýtkına Zavodtaǵy logıstıkalyq keshender jumysynyń ýaqytsha toqtatylǵanyn málimdedi.
Sankt-Peterbýrg mańyndaǵy Novosaratovka aýylynda Wildberries qoımalaryna jasalǵan ushqyshsyz ushaq shabýylynan úsh adam zardap shekti. Aleksandr Drozdenkonyń aıtýynsha, olardyń jaǵdaıy ortasha aýyrlyqta jáne olar aýrýhanada medısınalyq kómek alýda. Qoıma aýmaǵynda órt shyqty.
Sonymen qatar Sımferopoldegi Wildberries qoımasyna shabýyl jasalǵany belgili boldy. Kompanıanyń baspasóz qyzmeti: «Sımferopoldegi suryptaý ortalyǵy qaýipsizdik talaptaryna sáıkes evakýasıalandy», — dep málimdedi.
Budan bólek, ushqyshsyz ushaqtardyń biri Lenıngrad oblysy Kırov aýdany Sınávıno kentindegi «Severnaıa» qus fabrıkasynyń qoımasyna shabýyl jasady. Sonyń saldarynan ǵımarat qurylymynyń bir bóligi qulady, alaıda zardap shekkender joq.
Sońǵy aptalarda Wildberries nysandary Reseıdiń ártúrli óńirlerinde birneshe ret ushqyshsyz ushaq shabýyldarynyń nysanasyna aınaldy.