World Tennis президенті Дэвид Хаггерти Қазақстан теннис федерациясының президенті Болат Өтемұратовқа алғыс хат жолдап, Алматыда 10-13 қазан аралығында өткен конференция мен World Tennis AGM 2026 жылдық бас ассамблеясын ұйымдастыруды жоғары бағалады, деп хабарлайды infohub.kz сайты.
Қазақстан теннис федерациясының мәліметінше, ауқымды халықаралық шара Орталық Азияда алғаш рет өтіп, әлемнің 128 елінен келген 300-ден астам делегатты біріктірді. Форум аясында қатысушылар әлемдік теннисті дамытудың, халықаралық ынтымақтастықтың және ұйымның бұдан кейінгі қызметінің негізгі мәселелерін талқылады.
Өз хатында Дэвид Хаггерти шараны дайындаудың жоғары деңгейін, ұйымдастырушылардың кәсібилігін және қазақстандық тараптың ерекше қонақжайлығын атап өтті.
«World Tennis атынан сізге және Қазақстан теннис федерациясына Алматыда өткен конференция мен World Tennis 2026 жылдық бас ассамблеясының жиналысын тамаша ұйымдастырғаныңыз үшін шын жүректен алғыс білдіремін. 128 елдің өкілдері мен 300-ден астам делегат ұсақ-түйекке деген көңіл бөлушілік пен олардың келуін мінсіз ұйымдастыруды жоғары бағалады. Әуежайдағы жылы қарсы алудан бастап Көк-Төбедегі гала-кешке дейін бүкіл сапар барысында біз ерекше қамқорлыққа бөлендік», — делінген хатта.
World Tennis президенті бас ассамблеяны дайындау Almaty Open ATP 250 халықаралық турниріне дайындықпен қатар жүргенін ескере отырып, атқарылған ұйымдастыру жұмысының ауқымын да атап өтті.
«Конференция мен AGM-ді Almaty Open-ға дайындықпен қатар өткізу қаншалықты үлкен күш-жігерді талап еткенін толық түсінеміз. Осы жұмысқа қатысқандардың барлығы екі шараны да ұйымдастыруға кәсібилікпен және мұқияттылықпен қарағаны үшін ең жоғары мақтауға лайық», — деп атап өтті ол.
Хат соңында Дэвид Хаггерти қазақстандық тарапқа 17-25 қазан аралығында Almaty Arena-да өтіп жатқан Almaty Open ATP 250 турнирін сәтті өткізуді тіледі.
World Tennis бас ассамблеясының Алматыда өтуі қазақстандық теннис үшін маңызды оқиға болды. Тарихта алғаш рет Орталық Азия халықаралық теннис қауымдастығының осыншама өкілді форумын қабылдады. World Tennis басшылығының жоғары бағасы Қазақстанның ұйымдастыру мүмкіндіктерін және елдің халықаралық теннис аренасындағы өсіп келе жатқан беделін көрсетті.