Ғарыштағы бір ғана ядролық жарылыс төменгі орбитадағы спутниктердің 99,4%-ын небәрі 15 күнде істен шығаруы мүмкін. Осындай тұжырымға Мадисондегі Висконсин университеті мен Принстон университетінің зерттеушілері келді. Олар ғылыми жұмыстың препринтін arXiv серверінде жариялады, деп хабарлайды infohub.kz сайты.
Мамандар Оңтүстік Атлантика үстінде 500 шақырым биіктікте қуаты 1 мегатонна ядролық оқтұмсық жарылған жағдайды модельдеді. Бұл аймақта байланыс, интернет және ауа райын болжауды қамтамасыз ететін 13 300-ден астам белсенді ғарыш аппараты бар. Бұл туралы ScienceAlert ғылыми порталы жазды.
Зак Питерсен басқарған топтың есептеуінше, Жердің магнит өрісі әлсіреген Оңтүстік Атлантика магниттік аномалиясы аймағындағы жарылыс ұсталған радиоактивті бөлшектерден жасанды радиациялық белдеу құрады. Осы аймақтан ұшып өткен спутниктер қауіпті сәулелену дозасын алады: бір тәуліктен кейін аппараттардың 25%-ы, үшінші күннің соңында 78%-ы, бір аптадан кейін 98%-ы, ал 15-ші күні 99,4%-ы істен шығады. Радиациялық қорғаныс күшейтілген жағдайда да спутниктердің 99,3%-ы бір ай ішінде жарамсыз болады. Қуаты неғұрлым аз 100 килотонналық заряд қолданылса, бұл процесс шамамен бір жылға созылады.
Жұмыс авторлары 1962 жылғы Starfish Prime сынағын еске салды. Тынық мұхиты үстінде 400 шақырым биіктікте жарылған қуаты 1,4 мегатонна заряд бірнеше аппаратты істен шығарып, ғарышта ядролық қару сынауға тыйым салатын шартқа қол қойылуына әкелді. Бүгінде спутниктерді басқарудан айырылу соқтығыстардың тізбекті реакциясын тудырады: екі жылда шамамен 20 апат болады, ал он жылда орбитада 3900-ге жуық жаңа ғарыш қоқысы пайда болады. Бұл жаңа аппараттарды ұшыруды бірнеше жылға тежейді.