Japonıa premer-mınıstri Sanae Takaıtı Reseıden Habarovskide KSRO-nyń Japonıany jeńgenine arnalǵan eskertkishti alyp tastaýdy talap etti. Reseı SİM bul málimdemege jaýap berdi.
Sanae Takaıtı Habarovskide Japonıany jeńgenine arnalǵan, keńes soldaty ımperatorlyq hrızantema beınelengen shekara baǵanasyn qıratyp turǵan memorıaldyń ashylýyna narazylyq bildirdi.
"Hrızantemalyq eltańba Japonıanyń sımvoly retinde tanylǵan, al onyń joıylýyn beıneleıtin memorıaldyń ornatylýy múldem qabyldanbaıdy. Bul japon halqynyń sezimine áser etetin másele, jáne biz úkimet retinde reseı tarapynan eskertkishti ornatýdy toqtatyp, ony alyp tastaýdy qatań túrde suradyq. Biz ony alyp tastaýdy talap etýdi jalǵastyramyz", - dep jazdy el premeri H áleýmettik jelisinde.
RIA Novostıdiń jazýynsha, bul málimdemege Reseı SİM resmı ókili Marıa Zaharova pikir bildirdi.
"Eger Tokıo japon tarıhyna nemquraıly qaraıtyn bolsa, bul dert basqalarǵa taralmaýy kerek", - dedi ol.
Eske salaıyq, jaqynda Reseı prezıdenti Vladımır Pýtın alǵash ret Kýrıl araldaryna bardy, bul Tokıoda qatty reaksıa týdyrdy. Onda qatań narazylyq bildirip, japon halqynyń sezimine tıiskenin málimdedi. Sol kezdegi jaǵdaıǵa Marıa Zaharova da pikir bildirgen edi.