Reseıdiń Iaroslavl oblysynda aýyr qaıǵyly oqıǵa boldy: Pereslavl-Zalesskı mýnısıpaldyq okrýgine qarasty Kýbrınsk aýylyndaǵy pırotehnıka óndiretin zaýytta shyqqan órtten 14 adam qaza tapty, taǵy bir áıel zardap shegip, aýrýhanaǵa jatqyzyldy, dep habarlaıdy infohub.kz saıty.
RIA Novostı agenttiginiń málimetinshe, qarsańynda petarda shyǵaratyn kásiporyn aýmaǵynda eki ǵımarat órtengen. Órtti sóndirý múmkin boldy.
Oqıǵa faktisi boıynsha ónerkásiptik qaýipsizdik talaptaryn buzý týraly qylmystyq is qozǵaldy. TASS aqparatyna sáıkes, dál osy qaýipsizdik talaptarynyń buzylýy pırotehnıka óndirisindegi órtke sebep bolýy múmkin.
Iaroslavl oblysynyń ákimi Mıhaıl Evraev sársenbi, 30 qyrkúıekti óńirde aza tutý kúni dep jarıalady.
«30 qyrkúıekte óńirde Pereslavl-Zalesskı okrýgine qarasty Kýbrınsk aýylyndaǵy kásiporyndaǵy órtten qaza tapqandardy eske alý kúni jarıalanady. Óz atymnan jáne oblys ákimdiginiń atynan qaza tapqandardyń otbasylary men jaqyndaryna qaıǵyra kóńil aıtamyn», — dedi óńir basshysy.