Internatta oqyp júr
Talaı qazaq balasy –
Jańa óspirim, kókórim,
Beıne qoldyń salasy.
Balam zakon bildi dep,
Qýanar ata-anasy,
Oıynda joq olardyń
Sharıǵatqa shalasy.
Orys tili, jazýy –
Bilsem degen talasy.
Proshenıe jazýǵa
Tyrysar, kelse shamasy.
Ynsapsyzǵa ne kerek
İstiń aq pen qarasy?
Nan tappaımyz demeıdi,
Búlinse eldiń arasy.
Ijdıhatsyz, mıhnatsyz
Tabylmas ǵylym sarasy.
Az bilgenin kópsinse,
Kóp qazaqqa epsinse,
Kimge tıer panasy?
Orys teris aıtpaıdy,
Jaman bol dep olardy.
Qany buzyq ózi oılar
Qý menen sum bolardy,
Orysta qalar jalasy.
Bul iske kim vınovat:
Ia Semeıdiń qalasy,
Ia qazaqtyń alasy?
Oıynda joq biriniń
Saltykov pen Tolstoı,
Ia tilmash, ıa advokat
Bolsam degen bárinde oı,
Kóńilinde joq sanasy.
Aqyly kimniń bar bolsa,
Demes muny tili ashshy.
Aıtyńyzshy, bolsańyz
Zdravomysláshıı,
Aqyl aıtpaı ma aǵasy?
Paıda oılama, ar oıla,
Talap qyl artyq bilýge.
Artyq ǵylym kitapta,
Erinbeı oqyp kórýge.
Voennyı qyzmet izdeme,
Oqaly kıim kıýge.
Bos maqtanǵa salynyp,
Beker kókirek kerýge.
Qyzmet qylma oıazǵa,
Janbaı jatyp sónýge.
Qalaı sabyr qylasyń,
Jazyqsyz kúnde sógýge?
Ónersizdiń qylyǵy –
Týra sózin aıta almaı,
Qıt etýge bata almaı,
Qorlyqpenen shirýge.
Az aqshaǵa jaldanyp,
Ónbes iske aldanyp,
Jol taba almaı júrýge.
Alys ta bolsa izdep tap,
Korennoıǵa kirýge,
«Talapty erge nur jaýar»,
Júrip ómir súrýge.
Ia baılarǵa qyzmet qyl,
Erinbeı shaýyp jelýge.
Adal júrip, adal tur,
Schetyń týra kelýge.
Janyńa jaqsa, sońynan
Jalqaýlanba erýge.
Qısyq bolsa, zakon bar
Sýdıaǵa berýge.
Ol da oıaznoı emes qoı,
Alýǵa teńdik senýge.
Ia óz betińmen táýekel,
Zanımaısá prámotoı.
Jeńil kórme, bek kerek
Oǵan da ǵylym, oǵan da oı,
Qalaıynsha qaıda enýge?

---