YouTube jasandy ıntellekt kómegimen jasalǵan beınelerdi monetızasıalaýǵa jańa talaptar engizdi. TechCrunch-tiń habarlaýynsha, 16 shildeden bastap platforma «neıroslop» dep atalatyn — tómen sapaly, kóptep shyǵarylatyn beınelerden túsetin tabysty shekteıdi. Tolyǵyraq infohub.kz-de.
Sonymen qatar, platforma AI-kontentti tolyǵymen tyıym salmaıdy. Eger avtor neırojelilerdi óziniń senarıi, túsindirmeleri, taldaýy nemese bilim berý qundylyǵy bar túpnusqa beınelerdi jasaý úshin paıdalansa, mundaı rolıkter seriktestik baǵdarlamasyna qatysa alady.
Shekteýlerge úsh negizgi kontent túri ilikti. Birinshiden, YouTube bir úlgidegi, shablon boıynsha shyǵarylatyn beınelerdi monetızasıalamaıdy. Bul slaıd-shoý, qaıtalanatyn sújetter nemese avtordyń kórneki qatysýynsyz tolyǵymen AI-men jasalǵan rolıkter bolýy múmkin. Ekinshiden, tek shok nemese emosıalyq taqyryptarmen nazar aýdartýǵa tyrysatyn beınelerden tabys alynyp tastalady. Mysaly, qaýipti janýarlar týraly sheksiz rolıkter, mazasyz AI-jınaqtar nemese ataqty adamdardyń ólimi men apattar týraly jalǵan habarlamalar. Úshinshiden, vırtýaldy AI-keıipkerler maman retinde kórinip, medısına, qarjy, quqyq nemese saıasat boıynsha keńes beretin kanaldar da shekteýge ilikti. Mysaly, «AI-dáriger», «AI-zańger» nemese «AI-qarjy sarapshysy» degen kanaldar monetızasıadan aıyrylýy múmkin.
Tekserý kezinde YouTube jeke rolıkti emes, tutas kanaldy baǵalaıdy. Platforma eń tanymal jáne jańa beınelerdi, jalpy taqyrypty, sondaı-aq taqyryptardy, sıpattamalardy jáne muqabalardy taldaıdy. Eger kontenttiń basym bóligi jańa shekteýlerge sáıkes kelse, kanaldy YouTube seriktestik baǵdarlamasynan shyǵarýy múmkin.
YouTube-ta ózgeristerdiń maqsaty — sapaly kontent jasaý quraly retindegi jasandy ıntellektige tyıym salý emes, jarnamadan tabys tabý úshin ǵana bir úlgidegi AI-rolıkterdi kóptep jarıalaıtyn kontent-fermalardyń sanyn azaıtý ekenin túsindirdi.