Ystambul jaǵalaýynda eki kemeniń soqtyǵysýynan keıin bir keme jáne onyń ekıpajy baılanysqa shyqpaı qaldy. Bul týraly infohub.kz saıty habarlaıdy.
Ystambul gýbernatorlyǵynyń málimetinshe, oqıǵa Mármár teńizinde, Ystambuldyń batys mańyndaǵy Sılıvrı qalasynan ońtústikke qaraı 32 shaqyrym jerde, tańǵy saǵat 3-te bolǵan. Soqtyǵysýdan keıin Túrkıanyń týyn kótergen «Týgberk Imamoglý» kemesiniń ekıpajymen baılanys úzilgen. Al taǵy bir túrik kemesi «Alsý» zaqymdanbaǵan kórinedi.
Gýbernatorlyqtyń habarlaýynsha, jaǵalaý kúzetiniń Mármár jáne Bosfor komandalyq bólimsheleriniń teńiz kúshteri men tikushaǵy oqıǵa ornyna jiberilgen.
90 metrlik «Týgberk Imamoglý» júk kemesi Jerorta teńizindegi Iskenderýn portynan Qara teńizdegi Ereglıge bet alǵan. Al 91 metrlik «Alsý» munaı nemese hımıalyq tankeri Ystambuldyń shyǵysyndaǵy Kodjaelıden Egeı jaǵalaýyndaǵy Alıagaǵa júzip bara jatqan. Bul týraly Marine Traffic saıty habarlaıdy.
Mármár teńiziniń eki shetindegi Bosfor jáne Dardanell buǵazdarynan turatyn Túrik buǵazdary — álemdegi eń júk tasymaly qarqyndy joldardyń biri. Jyl saıyn Jerorta jáne Qara teńizder arasynda júzdegen myń keme júredi.