Qazaqstanda bir aı ishinde 500-den astam júk kóligi tekserilip, ystyq aýa raıyna baılanysty 302 kóliktiń qozǵalysy shekteldi. Bul – bir aılyq is-sharanyń nátıjesi, dep habarlaıdy inbusiness.kz QR Kólik mınıstrligine silteme jasap.
Qazaqstanda 10 shilde men 10 tamyz aralyǵynda «Nazar aýdaryńyz! Aýyr salmaqty kólik!» profılaktıkalyq aksıasy ótýde. Onyń maqsaty – iri gabarıtti jáne aýyr salmaqty júkterdi tasymaldaýdy baqylaýdy kúsheıtý, sondaı-aq avtomobıl joldaryn saqtaý. Sonymen qatar, elimizde jol tóseminiń buzylýyna jol bermeý úshin aýa temperatýrasy joǵary ýaqytta júk kólikteriniń qozǵalysyn ýaqytsha shekteıtin maýsymdyq temperatýralyq rejım qoldanylady.
Shekteýler aýa temperatýrasy +25 °C-tan joǵary bolǵanda engiziledi jáne júk kólikteriniń jekelegen sanattaryna qoldanylady. Alaıda bul halyqaralyq jáne jolaýshylar tasymalyna, sondaı-aq tez búlinetin, qaýipti jáne gýmanıtarlyq júkterdi tasymaldaýǵa qatysty emes. Tótenshe jaǵdaılardy joıýǵa, jol jumystaryna jáne áskerı tasymalǵa jumyldyrylǵan kólikter de erekshelikke ıe. Salmaq-gabarıttik normalar men temperatýralyq rejım talaptarynyń saqtalýyn aýmaqtyq kólik baqylaý organdary qadaǵalaıdy.
Aksıa aıasynda mamandar 500-den astam aýyr salmaqty kólik quralyn tekserdi. Tekserý nátıjesinde kólik zańnamasynyń 281 buzýshylyǵy anyqtaldy, onyń ishinde kólik quraldarynyń ruqsat etilgen massasynan asyp ketýdiń 116 faktisi bar. Sonymen qatar, maýsymdyq temperatýralyq rejım talaptaryn saqtamaǵany úshin 302 júk kóliginiń qozǵalysy shekteldi. Barlyq anyqtalǵan buzýshylyqtar boıynsha tasymaldaýshylar ákimshilik jaýapkershilikke tartyldy.
Qazaqstan Respýblıkasy Kólik mınıstrligi tasymaldaýshylardy qoldanystaǵy maýsymdyq shekteýlerdi eskere otyryp, baǵyttar men qozǵalys kestelerin aldyn ala josparlaýǵa shaqyrdy. Bul buzýshylyqtardy boldyrmaýǵa jáne avtomobıl joldarynyń saqtalýyn qamtamasyz etedi.
Tolyǵyraq infohub.kz saıtynan.