Qazaqstan Respýblıkasy Densaýlyq saqtaý mınıstrligi men Birikken Ulttar Uıymynyń halyq sany jónindegi qory (BUU qory) eldiń birqatar óńirinde ǵylymı zertteý júrgizýdi josparlap otyr. Bul zertteý ystyqtyń júkti áıelder men náresteler densaýlyǵyna áserin zertteýge arnalǵan. Tıisti kelisimge Densaýlyq saqtaý mınıstri Aqmaral Álnazarovanyń qor ókilderimen kezdesýi barysynda qol jetkizildi, dep habarlaıdy infohub.kz saıty.
Vedomstvonyń baspasóz qyzmeti: «Taraptar BUU qorymen birlesken zertteý júrgizý máselesin talqylady. Bul zertteý ystyqtyń júkti áıelder men náresteler densaýlyǵyna áserin zertteýge arnalǵan. Zertteý elimizdiń eń ystyq óńirleri – Qyzylorda, Túrkistan jáne Mańǵystaý oblystarynda júrgiziledi», – dep málimdedi.
BUU qorymen yntymaqtastyqtyń taǵy bir baǵyty – jastar densaýlyq ortalyqtaryn damytý. Aýyldyq jerlerde turatyn jasóspirimderge, jastarǵa jáne áıelderge qashyqtyqtan psıhologıalyq jáne reprodýktıvti kómek kórsetýdi qosa alǵanda, jańa tásilder engizý josparlanýda.
«Pılottyq joba aıasynda JDO bazasynda telepsıhologıanyń óńirlik ortalyqtaryn qurýdy, aýyl jastaryna bilikti psıhologtardyń qashyqtyqtan konsýltasıa berýin qamtamasyz etýdi jáne shalǵaı eldi mekenderge barý úshin mobıldi pánaralyq toptardy qalyptastyrýdy usynamyz», – dep atap ótti vedomstvo basshysy.
Sonymen qatar, Aqmaral Álnazarova zorlyq-zombylyq, sýısıd qaýpi, daǵdarystyq júktilik, reprodýktıvti shyǵyndar, mazasyzdyq jáne depressıa máseleleri boıynsha daǵdarystyq konsýltasıa berýge nazar aýdarý qajettigin atap ótti.
Sondaı-aq Qazaqstanda BUU Ýnıversıtetiniń jáne Qoǵamdyq densaýlyq saqtaý mektebiniń platformalaryn qurý josparlanýda. Bul platformalar klımattyń ózgerýiniń halyq densaýlyǵyna áserine basa nazar aýdarady.
Buǵan deıin Qazaqstanda sońǵy bes jylda balalarǵa medısınalyq kómek kórsetýge bólinetin qarjy kólemi eki esege ósip, jalpy densaýlyq saqtaý búdjetiniń tórtten birine jýyqtaǵany habarlandy.