Bir baıdyń Tórtkóz, Moınaq tóbetteri,
Ózderi, ıt bolsa da, ádepti edi.
Túnde úrip, kúndiz úrmeı, jaı jatatatyn
Bolady ádepti ıttiń ádetteri.
Tús mezgil eki tóbet toıyp jatyp,
Kempir naz-ókpelerin qoıyp jatyp,
As úıdiń aldyndaǵy kún shýaqta
Sóılesti ár nárseniń basyn shatyp.
Sóz qyldy jaqsylyqty, jamandyqty,
Jomarttyq, myrzalyq pen sarańdyqty.
Dostyqtyń, dushpandyqtyń jaıyn sóılep,
Qolǵa aldy tatýlyq pen arazdyqty.
Tilmarsyp sol ýaqytta aıtty Moınaq:
«Mensiz-aq qara, Tertkóz, óziń oılap.
Dúnıede odan artyq ne nárse bar -
Turǵannan tatýlyqpen kúlip-oınap?!
Dos bolsań qushaqtasyp, janǵa balap,
Sóz aıtsań bir-birińe «shyraq, qaraq»,
Alty kún asharshylyq kórseń daǵy,
Jemeseń biriń joqta biriń tamaq;
Dostyń dos juldyrmasa jaýǵa túgin,
Esh nárse aıyrmasa ara-jigin,
Biriniń qabaǵyna biri qarap,
Bilmese kúnniń qalaı ótkendigin! -
Ne bar dep dúnıede munan artyq,
Men qalyp bir qıalǵa turmyn búgin.
Joldyaıaq, aqsaq Qutpan, jaman Sarqus,
Solar da tatý bop júr, bizder túgil».
Sóıledi mańyzdanyp endi Tórtkáz:
«Moıneke, munyń ábden aıtarlyq sóz.
Turmaıtyn bir kún tatý nemiz bar dep,
Men daǵy oılaýshy edim osyny ár kez.
Ne kelip, tiri júrseń, ne ketpeıdi,
Araz bop, ekeýimizge ne jetpeıdi?
Tamaq toq, órkeni óssin ıemizdiń!
Tyıýsyz sógip-soqpaı, qurmetteıdi.
Rasyn ras demeı, tanamyz ba,
Bir táýlik tatýlyq joq aramyzda.
Turmaıtyn renishke sál nársege
Ekeýimiz talasamyz, baramyz da.
Mundaı is arasynda bolǵan emes,
Kóz salsaq burynǵy ótken babamyzǵa.
Atanyń jolyn qýmaı, laqqanda,
Týra jol sonan artyq tabamyz ba?».
Bul sózge kóńildenip, Moınaq tasty,
(Ol úlken, onan góri Tórtkez jas-ty)
«Tórtkózim!», «Moınekem!» dep birin biri,
Dos bolyp, sert aıtysyp, qushaqtasty.
Ekeýi birin biri súıdi, qushty,
Qyzyǵy basylmaǵan dostyq kúshti.
As úıden laqtyrylǵan bir omyrtqa
Solardyń naq janyna kelip tústi.
Kórgen soń maıly súıek, ıt turar ma,
Qushaǵyn jazyp ala júgiristi.
Dostyqty, aıtqan sertti bylaı qoıyp,
Ekeýi bir-birine saldy tisti.
Dosty dos munan artyq qalaı syılar
Júnderi burqyraǵan aspanǵa ushty.
Sý quıyp ústerine, jıylǵan jurt
Ekeýin zordan ǵana aıyrysty.

* * *
Itterge talassa da jarasady,
Áıtpese ıt ódetin adasady.
Dos bolǵan adamdarǵa qarap tursaq,
Bıikpen teń dep bolmas alasany.
Súıekteı arasyna nárse tússe,
Itterden olar artyq talasady.

---