Qazaqstandyq tenısshi Iýlıa Pýtınseva (álemdegi 82-oryn) Armenıa atynan óner kórsetetin Alına Charaevany (118-oryn) 6:3, 6:3 esebimen senimdi jeńip, Rýmynıanyń Iassy qalasynda ótip jatqan WTA-250 Unicredit Iasi Open týrnıriniń shırek fınalyna shyqty, dep habarlaıdy infohub.kz saıty.
Birinshi aınalymda Pýtınseva amerıkandyq Kler Lúdi (111) 7:5, 6:4 esebimen utty. Charaeva úshin bul týrnır WTA-250 deńgeıindegi alǵashqy jeńis boldy. Ol bastapqy machta Andorra ókili Vıktorıa Hımenes-Kasınsevany (114) 6:0, 6:1 esebimen tas-talqan etti. Reseıdiń Samara qalasynda týyp, Ispanıada jattyǵatyn 24 jastaǵy tenısshi kásibı jolyn jańa bastaǵan.
Buryn álem reıtıńiniń úzdik 20-lyǵyna kirgen Pýtınsevanyń tájirıbesi men sheberligi birinshi partıada baıqaldy. Ol alǵashqy geımde qarsylasynyń podachasyn alyp, toǵyzynshy geımde ekinshi breık jasady — 6:3.
Ekinshi sette boıy uzyn (183 sm, Pýtınsevada 163 sm) jáne Australian Open-tyń eki dúrkin chempıony Svetlana Kýznesovanyń jetekshiligimen jattyǵatyn Charaeva belsendi oınady. Ol birden breık jasap, basymdylyǵyn arttyrdy — 2:0. Alaıda qazaqstandyq tórtinshi breık-poınttan keıin esepti teńestirip, alǵa shyqty (4:3) jáne taǵy bir breık jasady. Pýtınseva ekinshi machbolda kezdesýdi 1 saǵat 33 mınýtta aıaqtady — 6:3, 6:3. Mach barysynda Pýtınseva úsh eıs berdi (qarsylasynda bir), utys ochkolary 68-52 óz paıdasyna boldy.
Shırek fınalda Pýtınseva mysyrlyq Maıar Sherıf (97) pen ıspandyq Keıtlın Kevedonyń (100) arasyndaǵy mach jeńimpazymen kezdesedi.
Alına Charaeva sol kúni taǵy bir mach ótkizedi — juptyq synda qazaqstandyq Jıbek Kýlambaevamen (174) birge reseılik Marıa Kozyreva (59) men Elena Prıdankınaǵa (76) qarsy oınaıdy.
Jekeleı týrnırdiń irikteýinde Kýlambaeva ıspandyq Leıra Romero Gormesten (143) 1:6, 4:6 esebimen jeńildi.
Unicredit Iasi Open týrnıri topyraq kortynda 2022 jyly paıda boldy. 2025 jyly ol WTA kúntizbesindegi Vengrıa Gran-prıiniń ornyn ıelenip, «250» sanatyn aldy. Jekeleı synda úsh ret rýmyndyqtar jeńiske jetti, biraq 2024 jyly reseılik jasóspirim Mırra Andreeva chempıon atandy. 2024 jyly juptyq synda qazaqstandyq Anna Danılına men reseılik Irına Hromacheva jeńimpaz boldy.
2026 jylǵy týrnırdiń júlde qory 283 350 dollardy quraıdy. Birinshi nómirli rýmyndyq Jaklın Krıstıan (37) sońǵy sátte jarystan bas tartty, sóıtip onyń ornyn Pýtınseva aldy.