Reseılik tanymal jýrnalıs Iýrı Dýd qazaqstandyq aýdıtorıaǵa qaıta júginip, kelesi saparynda qandaı ulttyq taǵamdardy tatyp kórý kerektigin surady, dep habarlaıdy infohub.kz.
Dýd óziniń Instagram-paraqshasynda 2021 jyly Mańǵystaý oblysyna sapary kezinde bloger Rýslan Ýsachevpen jazǵan suhbatynyń úzindisin jarıalady. Beınejazbada jýrnalıs pen bloger Aqtaý mańynda shubatty tatyp kórip, Bozjyra shatqalyna barady. Jarıalanym astynda Dýd qazaq asqanasy týraly suraq qoıdy.
«Qazaqstannan tys jerdegi dostar, sender tatyp kórdińder me? Áserlerińmen bólisińder! Qazaqstandaǵy dostar, múmkindik bolǵanda taǵy qandaı jergilikti taǵamdardy tatyp kórýge keńes beresizder?» — dep jazdy ol.
Sol saparda Dýd men Ýsachev shubatty dúkennen emes, jergilikti turǵyndardan alǵan. Jýrnalıs olarǵa jańa sýsyndy senimdi adamdardan alýǵa keńes berilgenin aıtty. «Qazaqstan týraly aıtqanda, eń aldymen qymyz eske túsedi. Biraq taǵy bir sút bar. Bul — shubat, túıe súti», — dedi Dýd beınejazbada.
Ol sondaı-aq sýsyn týraly áserimen bólisti: «Keshegi saýylǵan shubat, aıtýlarynsha, barlyq aýrýǵa shıpa. Densaýlyqtaryńyzǵa», — dep atap ótti jýrnalıs. Degýstasıadan keıin Rýslan Ýsachev shubattyń dámin aıranǵa uqsatty, al Dýd buǵan qosylyp, sýsynǵa oń baǵa berdi.
Jańa jarıalanym oqyrmandarǵa jýrnalısiń ótken saparyn eske saldy. Qazaqstandyq paıdalanýshylar oǵan kelesi saparǵa arnalǵan jergilikti taǵamdardy belsendi túrde usynýda. Dýd Qazaqstanǵa qaıta kele me, ázirge belgisiz. Buǵan deıin Aleksandr Nezlobınge bergen suhbatynda jýrnalıs elge kelýden qaýiptenetinin moıyndaǵan, sebebi Reseıde oǵan qatysty qylmystyq is qozǵalǵan, al 2022 jyly Reseı Ádilet mınıstrligi Dýdti sheteldik agentter tizilimine engizgen.