Buǵan deıin Reseıde sheteldik agent dep tanylǵan tanymal jýrnalıs Iýrı Dýd terorıstik jáne ekstremıstik áreketke qatysy bar adamdar tizimine qosyldy. Tıisti jazbany Qarjy monıtorıńi jónindegi federaldyq qyzmet (Rosfınmonıtorıng) engizip, 7039 nómirimen jarıalady, dep habarlaıdy infohub.kz saıty.
Tizimde jýrnalısiń derbes derekteri kórsetilgen: «Dýd Iýrı Aleksandrovıch, 1986 jylǵy 11 qazanda týǵan, Potsdam qalasy, GDR».
Basylymnyń túsindirýinshe, mundaı tizimge ený bank shottarynyń buǵattalýyna ákep soǵady. Adamǵa tek shekteýli somany alýǵa jáne jumsaýǵa ruqsat etiledi — ol da «óziniń tirshiligin, sondaı-aq ózimen birge turatyn, derbes tabys kózi joq otbasy músheleriniń tirshiligin qamtamasyz etý úshin» ǵana.
Iýrı Dýd — jýrnalıs jáne bloger, onyń YouTube vıdeohostıngindegi arnasynyń 10 mıllıonnan astam jazylýshysy bar. 2022 jyldyń sáýirinde Reseıdiń Ádilet mınıstrligi ony sheteldik agent dep jarıalady. Jýrnalıs bul sheshimge shaǵymdanyp, «sheteldik agent fýnksıasyn atqaratyn sheteldik BAQ tizilimine engizilgeni týraly habarlama jibermeýinen kóringen Ádilet mınıstrliginiń áreketsizdigin zańsyz dep tanýdy» talap etti. Alaıda Joǵarǵy sot onyń talabyn qanaǵattandyrýdan bas tartty.