Shyǵys Qazaqstan oblysyndaǵy Zaısan kólinde izdeý-qutqarý jumystary aıaqtaldy: qaıyq aýdarylǵannan keıin sýǵa ketken eki er adamnyń denesi sýdan alyndy, dep habarlaıdy infohub.kz saıty.
Tótenshe jaǵdaılar mınıstrliginiń resmı Telegram-arnasynda málim bolǵandaı, izdeý jumystary Tarbaǵataı aýdanynyń Tuǵyl aýyldyq okrýginde júrgizildi.
«15 qyrkúıekte úsh er adam kólde qaıyqpen balyq aýlap júrgen. Qatty jeldiń saldarynan qaıyq aýdarylyp ketti. 1968 jyly týǵan balyqshylardyń bireýi sýdan óz betinshe shyǵa aldy. Ony jergilikti turǵyndar qutqaryp aldy. 1968 jáne 1995 jyly týǵan eki er adam sýǵa ketti. Olarda qutqarý jıletteri bolmaǵan», — dep atap ótti TJM.
Vedomstvonyń dereginshe, aqparat túsken sátten bastap oqıǵa ornynda TJM jedel shtaby ornalastyryldy. İzdeý-qutqarý jumystaryna TJM bólimsheleriniń kúshteri men quraldary tartyldy: súńgýirler, qutqarý katerleri, qaıyqtar jáne basqa da júzý quraldary, ushqyshsyz ushý apparattary, sýasty drony, sondaı-aq jergilikti turǵyndar.
Búgin izdeý jumystary barysynda jergilikti turǵyndar 1968 jyly týǵan er adamnyń denesin tapty. Ekinshi qaza tapqan 1995 jyly týǵan adamnyń denesin TJM súńgýirleri jaǵadan 8,9 km qashyqtyqta tapty. İzdeý jumystary táýlik boıy júrgizildi. Qutqarýshylar kóldiń aıtarlyqtaı akvatorıasyn, onyń ishinde sýasty tehnıkalyq quraldaryn paıdalanyp tekserdi. TJM súńgýirleri 8 ret súńgý jasady.
Qutqarý bólimsheleriniń jumysyn kóldiń aıtarlyqtaı tereńdigi, túbiniń kúrdeli relefi jáne sý astyndaǵy shekteýli kóriný qıyndatty.