Shyǵys Qazaqstan oblysyndaǵy Zaısan kóline balyq aýlaýǵa baryp, úılerine oralmaǵan eki er adam bir aptadan keıin qaza tapqan kúıde tabyldy. Bul týraly infohub.kz saıty habarlaıdy.
Qazaqstan Respýblıkasy Tótenshe jaǵdaılar mınıstrliginiń málimetinshe, 22 qyrkúıekte Shyǵys Qazaqstan oblysy Kúrshim aýdany Balyqshy aýyldyq okrýginde 1979 jáne 2001 jyly týǵan eki er adam Zaısan kóline balyq aýlaýǵa baryp, qaıtyp oralmaǵan.
TJM kúshteri men quraldary úzdiksiz izdestirý jumystaryn uıymdastyrdy. İzdeýge jergilikti turǵyndar da óz qaıyqtarymen qatysty.
İzdestirý jumystarynyń birinshi kúni jaǵalaýdan 3–4 km qashyqtyqta sýǵa batqan qaıyq tabyldy.
29 qyrkúıekte jergilikti turǵyndar 2001 jyly týǵan er adamnyń denesin tapty. 30 qyrkúıekte qutqarýshylar sýdan 1979 jyly týǵan er adamnyń denesin alyp shyqty.
«İzdestirý jumystary barysynda TJM qutqarýshylary 63 sýasty súńgýin jasap, kóldiń jaǵalaý syzyǵyn jáne sý aıdynyn, onyń ishinde ushqyshsyz ushý apparattaryn qoldaný arqyly tekserdi. İzdestirý jumystaryna aýa raıy jaǵdaılary, qatty jel men sý aıdynyndaǵy tolqyn, sondaı-aq tekseriletin sý aıdynynyń aýmaǵynyń úlkendigi kedergi keltirdi. Bul súńgýirlerdiń jumysyn jáne sýdaǵy izdestirý toptarynyń qozǵalysyn aıtarlyqtaı qıyndatty», — dep qosty TJM.