Ýkraına Qarýly Kúshteriniń burynǵy bas qolbasshysy, qazirgi ýaqytta Ulybrıtanıadaǵy elshisi Valerı Zalýjnyı Ýkraınanyń NATO-ǵa eshqashan múshe bolmaıtynyn málimdedi, dep habarlaıdy infohub.kz saıty.
«Eýropalyq aqıqat» basylymynyń málimetinshe, Zalýjnyı Ýkraına Konstıtýsıasynda bekitilgen alánsqa kirý baǵytyn perspektıvaly dep sanamaıdy. «Men NATO-ny óte jaqsy bilemin. Shamamen 12 jyl boıy NATO standarttaryn meńgerýge jeke ózim atsalystym jáne jyl saıyn NATO-ǵa ene jazamyz degen ertegilerdi tyńdadym. Ókinishke qaraı, biz oǵan eshqashan kirmeımiz!» — dedi burynǵy bas qolbasshy.
Zalýjnyı Qarýly Kúshterdiń qazirgi damý deńgeıimen alánsqa qosylý múmkin emes dep senimdi. Sondaı-aq ol NATO Ekinshi dúnıejúzilik soǵys kezindegi doktrınalardy basshylyqqa alatynyn atap ótip, uıymnyń áleýetine óte teris baǵa berdi.
«NATO, eń aldymen, qazirgi kúıinde qalady, al Ýkraına Reseı Federasıasynyń jarty deńgeıine teńesý úshin qajetti standarttarǵa kóshýine 12 jyl ketedi», — dedi general.
Degenmen Zalýjnyı búginde Ýkraınaǵa NATO elderinde bar tehnologıalar qajet ekenin moıyndady.
Burynǵy bas qolbasshy sondaı-aq Ýkraına úshin basqa odaqtar tıimdirek bolýy múmkin degen pikir bildirdi. «Ýkraına qurylatyn bloktar men odaqtarǵa qosylady. Sirá, eýropalyq áskerı qaýipsizdik blogy týraly sóz bolady», — dep esepteıdi ol.