Japonıada bala kútimine baılanysty demalysqa shyqqan tuńǵysh mer Sóko Kavata TIME jýrnalynyń eń yqpaldy 100 jas juldyzynyń qataryna endi. Bul týraly 36 jastaǵy áıel 15 qyrkúıekte tuńǵysh balasyn dúnıege ákelgennen keıin birneshe apta ótken soń málim boldy, dep habarlaıdy infohub.kz saıty.
Kıoto prefektýrasyndaǵy Iavata qalasynyń meri Kavata bıyl saılanbaly laýazym ıeleri bala týýǵa baılanysty demalys alýy kerek pe degen ulttyq pikirtalastyń ortasynda qalǵan edi. Onyń dekretke shyǵý sheshimi Japonıada qoldaý men syndy qatar týdyrdy. Týý deńgeıin kóterýge tyrysyp jatqan el úshin bul másele erekshe ózekti boldy.
Áleýmettik jelilerdegi keıbir pikirler bala tárbıeleýdiń ońaı emes ekenin, Kavatanyń qolynan kelgeninshe áreket etip jatqanyn atap ótti. Japon qoǵamy júktilikti eskeretin júıelerdi ázirleı almaǵanyn bir paıdalanýshy jazsa, taǵy bireýi Kavata otbasyn birinshi orynǵa qoıý arqyly ózge áıelderdiń saıasatqa kelýin jeńildetetin tamasha úlgi kórsetip jatqanyn aıtty.
Alaıda synshylar qoǵamdyq mindetterden qol úzý «jaýapsyzdyq» dep sanady. Eger Kavata júkti bolǵysy kelse, «laýazymǵa kirispes buryn solaı isteýi kerek edi» degen pikirler de aıtyldy. Bireýi uzaq merzimdi demalysqa shyqqysy kelgen joǵary laýazymdy tulǵalar «qyzmetten ketýi kerek» dese, taǵy bireýleri dekret demalysy kezinde jalaqyny qysqartý qajet dep talap etti.
Balasyn dúnıege ákeler aldynda Bı-bı-sıge bergen suhbatynda Kavata syndardy elemeı, óz jumysynan lázzat alatynyn maqtanyshpen málimdep, qazir balaly bolyp, otbasyn qurýǵa dál ýaqyt kelgenine senetinin jetkizdi.
«Eger dekretke shyqqan saıasatkerlerdi synaıtyn bolsaq, bul 20 men 40 jas aralyǵyndaǵy — júkti bola alatyn barlyq áıeldi memlekettik qyzmetten shettetip jatqanymyz», — dedi ol.
Japonıa qalalyq qyzmetkerlerge dekret demalysyn bergenimen, jergilikti saılanbaly laýazym ıeleri úshin qazir zańnamalyq negiz joq. Sondyqtan Kavata óz keńsesimen birlesip jospar jasady. Ol 16 apta boıy ókilettigin orynbasary Sıgeto Nosege berip, múmkindiginshe qashyqtan jumys istedi.
15 qyrkúıekte mer Kavata qyz balany dúnıege ákelgenin jarıalady. Ol X áleýmettik jelisinde fotosýret jarıalap, qoldaý kórsetkenderge alǵys aıtty jáne áleýmettik máselelerdi búkil el kóleminde nasıhattaý maqsatynan taıynbaıtynyn taǵy da rastady.
«Aldaǵy sansyz qıyndyqqa betpe-bet kelip, ata-ana bolýdyń shynaıy mánin túsine otyryp, sol tájirıbeni júrgizip jatqan saıasatyma naqty ýaqytta beınelegim keledi», — dep jazdy ol.
«Búginde ata-analar men balalar aldynda turǵan kóptegen syn-qaterge sol ómirdi ózim bastan keshirip jatqan adam retinde dál sol kózqaraspen qarap, birge qalaı jol taba alatynymyzdy oılaǵym keledi».