Japonıanyń Tokıoǵa irgeles Tıba prefektýrasynda 4 myńnan astam turǵyn áli kúnge deıin elektr jaryǵynsyz otyr. Elge 20 qyrkúıekte kelgen taıfýn Tynyq muhıt jaǵalaýyn boılaı ótken bolatyn, dep habarlaıdy infohub.kz saıty.
News of Japan dereginshe, qaza tapqandar Tıba men Kanagava prefektýralarynda tirkelgen. Qazirgi tańda qurbandar sany 13 adamǵa jetti, sońǵy jaǵdaı dál Kanagavada tirkeldi.
Onda 20 jastaǵy qyz qaza tapty: ony aýa raıynyń qolaısyzdyǵynan týyndaǵan kóshkin zaqymdaǵan ǵımarattan alyp shyqty. Zardap shegýshini aman alyp qalý múmkin bolmady. Buǵan deıin ol habar-osharsyz ketkender tiziminde bolǵan.
TASS aqparatyna sáıkes, Tıba prefektýrasynyń 4 myńnan astam turǵyny elektr qýatynsyz qaldy. Sonymen qatar, bes jerdegi kóshkin buryn kún saıyn 54 myń adam paıdalanǵan jergilikti temirjoldyń birin úzip tastady.
Apattyń saldaryn joıý jumystaryn jedel qyzmetter jalǵastyrýda. Tıba prefektýrasynda elektr jáne sýmen jabdyqtaýdaǵy uzaq úzilister saqtalýda. TEC-FORCE mamandary Japon qurylys merdigerleri qaýymdastyǵymen, Ózin-ózi qorǵaý kúshterimen jáne Tokyo Electric Power kompanıasymen birlesip, Togane qalasyndaǵy óshirýlerge sebep bolǵan zaqymdalǵan jol ýchaskesin tazalaýda — qulaǵan aǵashtardy jınastyrýda. Jumystar elektr jáne sý berýdi tez arada qalpyna keltirýge baǵyttalǵan.
Mıýra men Iokosýka aýdandaryndaǵy izdestirý operasıalaryna órt sóndirýshiler, polısıa, Qurlyqtaǵy ózin-ózi qorǵaý kúshteriniń 31-polki jáne jergilikti órt sóndirý drýjınalary, sondaı-aq Iokosýka men Mıýranyń sheberleri jumyldyrylǵan — olar úzdiksiz izdestirý jumystaryn jalǵastyrýda.