Qytaıdyń ORG Technology Co Ltd kompanıasy — Qytaıdaǵy alúmını bankileriniń iri óndirýshisi jáne álemdegi eń iri bes kompanıanyń biri — Almatyda zaýyt salý jobasy úshin jergilikti seriktestermen kelisimge kelgen sıaqty. Buǵan ekonomıs, qarjy keńesshisi jáne Finmentor.kz negizin qalaýshy Arman Bataev nazar aýdardy, dep habarlaıdy infohub.kz.
«Astana» halyqaralyq qarjy ortalyǵynda (AHQO) jańa holdıńtik kompanıa — ORG OREA Industries Holding Ltd. tirkeldi. Onyń jarǵylyq kapıtaly $47,4 mln quraıdy. Kompanıanyń quryltaıshylary ORG Kazakhstan Packaging Ltd. jáne Oasis Partners Holding SPC Ltd. boldy. Keıin sońǵysy ataýyn OREA Industries Holding SPC Ltd. dep ózgertti.
Jańa holdıń Almatydaǵy enshiles kompanıany basqarý úshin qurylǵan. Bul kompanıa eki komponentti metal bankiler shyǵaratyn kásiporyndy salýǵa, ıelenýge, paıdalanýǵa jáne qyzmet kórsetýge tıis. Zaýyttyń josparlanǵan qýaty — jylyna 1 mlrd banki.
ORG Technology kompanıasynyń Qazaqstan naryǵyna shyǵý jospary buǵan deıin belgili bolǵan edi. 2025 jyldyń maýsymynda qytaılyq kompanıanyń dırektorlar keńesi Qazaqstanda jobalyq kompanıa quryp, Almatyda eki komponentti alúmını bankileri zaýytyn salý týraly sheshim qabyldady.
Jobaǵa salynatyn jalpy ınvestısıa shamamen 646,52 mln ıýán nemese $90-95 mln dep baǵalanǵan. Keıin «Astana» halyqaralyq qarjy ortalyǵynda jarǵylyq kapıtaly $50 mln bolatyn ORG Kazakhstan Packaging Ltd. tirkeldi.
Endi ORG OREA Industries Holding Ltd. paıda bolýy jobaǵa qazaqstandyq seriktesterdiń tartylýy múmkin ekenin kórsetedi. Jańa holdıńtiń quryltaıshylarynyń biri bolǵan Oasis Partners Holding SPC Ltd. 2025 jyldyń 11 jeltoqsanynda tirkelgen. 2026 jyldyń 25 mamyrynda kompanıa ataýyn OREA Industries Holding SPC Ltd. dep ózgertti.
OREA Industries Holding SPC Ltd. aksıoneri — ALGAZY Holding Limited. Bul kompanıa 2025 jyldyń 27 aqpanynda $10,2 mln jarǵylyq kapıtalmen tirkelgen. Onyń quryltaıshylary — Sáýle Alǵazıeva jáne Záýre Alǵazıeva. Alǵazıevter otbasy Qazaqstandaǵy eń kóne kásiporyndardyń biri — «Pervyı pıvzavod» JSHS-niń edáýir úlesine ıe. Sonymen qatar, otbasy mal sharýashylyǵy jáne аlkogóldik sýsyndar óndirisi salasyndaǵy basqa da jobalardy damytýda.
Bul Qazaqstanda bastalýy múmkin alúmınıdi qaıta óńdeýdegi alǵashqy joba emes. Álemdegi eń iri alúmını óndirýshilerdiń biri — qytaılyq Xinfa Group — Pavlodar oblysyndaǵy zaýytqa $15 mlrd ınvestısıa salady. Zaýytta shıkizattan bólek, daıyn ónimder, onyń ishinde symdar men smartfon korpýstary shyǵarylady.
Álemdegi alúmınıdi qaıta óńdeýshilerdiń alǵashqy ondyǵyna kiretin Xinfa Group $15 mlrd-ty úsh kezeńde ınvestısıalaýy tıis: birinshi kezeń — 2026-2027 jyldary $5,5 mlrd, ekinshi kezeń — 2028 jyly $4 mlrd, úshinshi kezeń — qalǵan $5,5 mlrd.