Qazaqstanda «70-30» prınsıpi dep atalatyn zeınetaqy tóleý modeli qaıta qaralýy múmkin. Buqaralyq aqparat quraldarynda jarıalanǵan málimetterge sáıkes, zeınetkerler taǵaıyndalǵan tólemniń tek 30 paıyzyn qolyna alady, al qalǵan 70 paıyzy olar jatqan mekemelerge jiberiledi, dep habarlaıdy infohub.kz saıty.
Buǵan deıin býhgalterlerge arnalǵan Mybuh.kz saıtynda qazaqstandyqtar belgili bir mekemelerde jatqan kezde taǵaıyndalǵan zeınetaqynyń 30 paıyzyn tóleý, al qalǵan 70 paıyzyn tóleýdi toqtata turý usynylǵany týraly jarıalanym shyqqan.
«Eńbek mınıstrliginde bul sharany osyndaı azamattardy ustaýǵa memleket qazirdiń ózinde qarjy bólip otyrǵanymen túsindiredi. Osyǵan uqsas tártip stasıonarlyq ortalyqtardaǵy azamattardyń jekelegen sanattary úshin de qoldanylady: zeınetaqynyń 30 paıyzy adamǵa tólenedi, al 70 paıyzy ortalyqtyń jeke shotyna jiberilip, onyń ishinde ony ustaýǵa jumsalady», — delingen jarıalanymda.
Sonymen qatar, bosatylǵannan keıin nemese memlekettik qamtamasyz etý toqtatylǵannan keıin zeınetaqy kelesi aıdyń birinshi kúninen bastap tolyq kólemde qaıta bastalady.
«QazAqparat» habarlaýynsha, jańa modeldiń negizgi elementi — tólemniń 70 paıyzy mekemelerdiń shottaryna aýdarylmaıdy, al 30 paıyzy azamattyń ózinde qalady.
Eńbek mınıstrliginde bul arnaıy áleýmettik qyzmetter kórsetý ortalyqtarynda (AÁQKO) stasıonarlyq jaǵdaıda jatqan azamattarǵa, onyń ishinde qarttar men múgedekterge, sonyń ishinde balalarǵa arnalǵan ınternat-úılerde, sondaı-aq qylmystyq-atqarý júıesi mekemelerindegi azamattarǵa qatysty ekenin aıtady. «Memleket olardyń turýyn, komýnaldyq qyzmetin, tamaqtanýyn, kıimmen, medısınalyq kútimmen, dári-dármekpen jáne ońaltýmen qamtamasyz etýdi tolyq kólemde jalǵastyrady», — deıdi mamandar.
NUR.KZ tilshisi Qazaqstan Respýblıkasy Eńbek jáne halyqty áleýmettik qorǵaý mınıstrliginiń baspasóz qyzmetine suraý joldady.