Ýkraına prezıdenti Vladımır Zelenskı elde soǵys jaǵdaıynda prezıdenttik saılaý ótkizý memlekettiń ydyraýyna ákelip, úlken qaýip tóndiretinin málimdedi, dep habarlaıdy infohub.kz saıty.
RBK-Ýkraına basylymynyń dereginshe, jýrnalısermen kezdesýde Zelenskı qazirgi ýaqytta daýys berý úshin qaýipsiz jaǵdaı joq ekenin atap ótti. «Meniń oıymsha, eger biz eldi ydyratqymyz kelse, ondaı soǵys kezinde saılaý baǵytynda qozǵala alamyz», — dedi ol.
Memleket basshysy Ýkraınany buǵan deıin de saılaý ótkizýge ıtermelegenin, alaıda qaýipsiz ári demokratıalyq daýys berýdi uıymdastyrý boıynsha naqty usynystar túspegenin aıtty. Zelenskı seriktester áskerı qyzmetshiler, maıdan shebindegi aýmaqtardyń turǵyndary jáne sheteldegi ýkraındyqtar úshin daýys berý múmkindigin qosa alǵanda, naqty jaǵdaılardy usynsa, bul máseleni talqylaýǵa daıyn ekenin bildirdi.
Ol sondaı-aq qazir mundaı jaǵdaılar joq ekenin, óıtkeni Reseı atysty toqtatýǵa kelispeıtinin atap ótti. «Meniń oıymsha, ondaı soǵys kezinde saılaý jalpy úlken qaýip. Dál qazir saılaý — bul memleket úshin sýnamı, ol Ýkraınany ydyratady. Sondyqtan meniń strategıam — eldi soǵystyń aıaqtalýyna jetkizý jáne táýelsiz, egemen memleketti saqtaý. Men ony oryndap jatyrmyn», — dep túıindedi Zelenskı.
Buǵan deıin eks-qorǵanys mınıstri Mıhaıl Fedorov ýkraındyqtarǵa beıneúndeý jazyp, soǵys aıaqtalǵanǵa deıin prezıdent saılaýyn ótkizýdi usynǵan bolatyn. Keıin Zelenskı keńsesi bul usynysqa jaýap berdi.