Qazaqstanda «Aqtóbe – Oral – Reseı Federasıasy shekarasy» halyqaralyq trassasynda Jaıyq ózeni arqyly jańa kópir salý josparlanýda, dep habarlaıdy infohub.kz saıty.
QR Kólik mınıstrliginiń basshylyǵy Batys Qazaqstan oblysyna jumys sapary barysynda Jaıyq ózeni arqyly jańa avtomobıl kópirin salý jobasynyń ázirlemesimen tanysty. Joba Memleket basshysynyń tapsyrmasy boıynsha júzege asyrylýda jáne halyqaralyq mańyzy bar avtomobıl jolynda qaýipsiz ári úzdiksiz qozǵalysty qamtamasyz etýge baǵyttalǵan.
Jańa kópir tehnıkalyq tekserý qorytyndysy boıynsha avarıalyq dep tanylǵan qoldanystaǵy kópir qurylystarynyń qasynda salynatyn bolady. Jobany iske asyrý jol qozǵalysy qaýipsizdigin arttyrýǵa jáne aımaqtyń jol jelisindegi eń júktelgen ýchaskelerdiń birinde senimdi kólik baılanysyn qamtamasyz etýge múmkindik beredi.
Joba boıynsha 8 shaqyrym avtomobıl jolyn, sondaı-aq eki zamanaýı monolıtti kópir salý kózdelgen: arnalyq bóliginiń uzyndyǵy 513 metr jáne jaıylmalyq bóliginiń uzyndyǵy 1710 metr.
Qazirgi ýaqytta tehnıkalyq-ekonomıkalyq negizdeme ázirlenip, ýákiletti memlekettik organdarmen kelisildi.
Zamanaýı ınjenerlik sheshimder men tehnologıalardy qoldaný kólik ınfraqurylymynyń senimdiligin aıtarlyqtaı arttyrýǵa, ýchaskeniń ótkizý qabiletin ulǵaıtýǵa jáne nysannyń uzaq merzimdi qaýipsiz paıdalanylýyn qamtamasyz etýge múmkindik beredi.
Jobamen tanysý qorytyndysy boıynsha Kólik mınıstrliginiń basshylyǵy memlekettik saraptamadan ótýdi jedeldetýdi, jaqyn arada qurylysty qarjylandyrý kózin anyqtaýdy, sondaı-aq jobany iske asyrýdyń barlyq kezeńderinde sapany qatań baqylaýdy qamtamasyz etýdi tapsyrdy.