Iadrolyq fızıka ınstıtýtynyń (IaFI) qyzmetkerleri jalaqy men demalys aqysynyń keshiktirilgenin habarlady. Mekeme basshylyǵy bereshektiń baryn rastap, jaqyn arada qarajat túsetinine sendirdi. Bul týraly Orda.kz habarlaıdy.
Buǵan deıin áleýmettik jelilerde ınstıtýt qyzmetkerleriniń jalaqy almaǵany, al kópshiliginiń demalys aqysynsyz demalysqa ketkeni týraly jazba jarıalandy. Avtorlar shilde aıynyń sońyna deıin eseptesip berý týraly ýádelerdiń senim týdyrmaıtynyn aıtyp, jaǵdaıdy qazaqstandyq ǵylymǵa soqqy dep atady.
Instıtýttaǵylar jaǵdaıǵa túsinik berip, qarjylandyrýdyń túsýi kútiletinin aıtty. Ókilderdiń aıtýynsha, mamyr aıyndaǵy jalaqynyń 40 paıyzy men maýsym aıyndaǵy 85 paıyzy kólemindegi bereshekti 20-24 shilde aralyǵynda tóleý josparlanǵan. Al shilde aıynyń jalaqysyn qyzmetkerler ádettegi merzimde – Qazaqstan zańnamasyna sáıkes 10 tamyzdan keshiktirmeı alady.
Buǵan deıin Iadrolyq fızıka ınstıtýty eldegi negizgi ǵylymı ortalyqtardyń biri ekeni habarlanǵan bolatyn. Munda Almatydaǵy jalǵyz zertteý ıadrolyq reaktory jumys isteıdi, onyń bazasynda onkologıalyq aýrýlardy dıagnostıkalaý jáne emdeýge arnalǵan radıoızotoptar óndiriledi, ǵylymı zertteýler júrgizilip, Qazaqstannyń bolashaq atom salasy úshin mamandar daıyndalady.