Jambyl oblysynda kafede kámeletke tolmaǵan balany balaǵattaǵan er adam 10 táýlikke ákimshilik qamaýǵa alyndy. Alaıda buzýshy eshteńe esinde joq ekenin aıtady, dep habarlaıdy infohub.kz.
Jambyl oblysy sottarynyń resmı Telegram-arnasynda habarlanǵandaı, Sarysý aýdandyq soty er adamǵa qatysty usaq buzaqylyq jasaǵany úshin (ÁQBtK-niń 443-babynyń 1-bóligi) ákimshilik quqyqbuzýshylyq týraly isti qarady.
2026 jyldyń tamyz aıynda Jańatas qalasynda ol qorshaýdan asyp, kafe aýmaǵyna kirgen, sodan keıin kámeletke tolmaǵan balany kórip, ony balaǵattap, janyndaǵy zattardy laqtyra bastaǵan. Balanyń anasy polısıaǵa habarlasyp, hattama toltyrylǵan.
Kiná taraptardyń aıǵaqtarymen, hattamamen jáne istiń basqa materıaldarymen rastalǵan. Sotta er adam mas kúıinde bolǵanyn jáne ne bolǵanyn esine túsirmeıtinin túsindirgen. Jábirlenýshiniń anasy mundaı jaǵdaı buryn da bolǵanyn aıtyp, qatań jaza taǵaıyndaýdy suraǵan.
ÁQBtK-niń 443-babynyń 1-bóliginiń sanksıasy 20 AEK mólsherinde aıyppul nemese 20-dan 60 saǵatqa deıingi merzimge qoǵamdyq jumystarǵa tartý ne 5-ten 15 táýlikke deıingi merzimge ákimshilik qamaýǵa alýdy kózdeıdi. Ákimshilik jaýapkershilikti jeńildetetin nemese aýyrlatatyn mán-jaılar sot tarapynan anyqtalmaǵan.
Sot qaýlysymen er adam kináli dep tanylyp, oǵan 10 táýlik ákimshilik qamaý jazasy taǵaıyndaldy. Qaýly zańdy kúshine engen joq.