Jambyl oblysynda turǵyn úı-kommýnaldyq sharýashylyq mekemesinde ekolog bolyp jumys istegen áıel qar tazalaý kezinde aýyr óndiristik jaraqat aldy. Oqıǵa 2023 jyldyń jeltoqsanynda bolǵan: áıel kóshe sypyryp júrip taıyp ketip, qulap qalǵan. Qordaı aýdandyq soty jumys berýshi men jumysker arasyndaǵy bitimgershilik kelisimin bekitip, oǵan 1,6 mln teńge tólenetin boldy, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, Qordaı aýdandyq soty densaýlyqqa keltirilgen zıandy óteý týraly azamattyq isti qarady. Jazataıym oqıǵada jumys berýshiniń kinási 100% dep tanyldy.
Medısınalyq qorytyndyǵa sáıkes, áıeldiń eńbekke qabilettiligi 50% joǵalǵan. Oǵan qosymsha medısınalyq kómek jáne áleýmettik ońaltý, onyń ishinde sanatorı-kýrorttyq emdeý usynylǵan.
Talap qoıýshy sotqa densaýlyqqa keltirilgen zıandy óteýdi jáne medısınalyq usynystarda kózdelgen emdelýdi qamtamasyz etýdi surap júgingen. Sot talqylaýy barysynda taraptar kelisimge kelip, ózara tıimdi shart jasasty.
Kelisim sharty boıynsha jumys berýshi sot uıǵarymy zańdy kúshine engennen keıin úsh jumys kúni ishinde áıelge 1,6 mln teńge tóleýge mindettendi. Kelisim bekitilip, is boıynsha is júrgizý toqtatyldy. Uıǵarym zańdy kúshine endi.