Жамбыл облысында кәмелетке толмағандар қатысқан бірнеше қайғылы оқиғадан кейін өңір басшылығы қатаң кадрлық шешімдерге көшті: облыс әкімі Ербол Қарашөкеев аудан әкімдеріне қатаң сөгіс жариялады, деп хабарлайды infohub.kz сайты.
Өңір басшысы жауапты мемлекеттік органдардың жұмысын қатты сынға алды. Оның айтуынша, жүргізіліп жатқан профилактикалық шаралар көбіне тек формальды сипат алып, нақты нәтиже бермейді.
Ербол Қарашөкеев шенеуніктердің жұмысын ұйымдастырылған ашық сабақтардың, тренингтердің, сауалнамалар мен рейдтердің санымен емес, көшелер мен мектептердегі нақты қауіпсіздікпен бағалау керектігін атап өтті.
Жиналыс қорытындысы бойынша облыстың басшы құрамына жаппай тәртіптік жаза қолданылды. Жамбыл облысы әкімінің орынбасарына сөгіс жарияланды. Байзақ, Жамбыл, Талас және Қордай аудандарының әкімдері қатаң сөгіс алды. Аталған аудандардың осы бағытқа жетекшілік ететін әкім орынбасарларына да қатаң тәртіптік жаза қарастырылған.
Сонымен қатар құқық қорғау органдарын да елеулі тексеріс күтіп тұр: полиция департаментінің бастығына төрт аудандағы полиция бөлімдерінің басшыларына қатысты қызметтік тексеру жүргізу тапсырылды.
Облыс басшылығының қатаң реакциясы қазан айында өңірді қалың толқытқан, кәмелетке толмағандар қатысқан бірнеше шулы әрі қайғылы оқиғадан кейін болды. Мәселен, Байзақ ауылында жасөспірімдер арасындағы топтық жанжалдан кейін 2011 жылы туған бала қаза тапты. Бұл факті бойынша құқық қорғау органдары қылмыстық іс қозғады.
Екінші резонансты оқиға қазан айының соңында Жамбыл ауданының Бірлесу-Еңбек ауылында болды. Онда төбелес салдарынан тоғызыншы сынып оқушысы ауыр жарақат алып, реанимацияға түсті. Қазір полиция денсаулыққа қасақана зиян келтіру фактісін тергеп қана қоймай, жанжалдың себебі жүйелі мектеп бопсалауы (рэкет) болуы мүмкін деген ақпаратты да тексеруде.