Jambyl oblysynda polıseıler esirtkiniń zańsyz aınalymyna qarsy arnaıy operasıa júrgizip, nátıjesinde 600 kelige jýyq esirtki zaty tárkilenip, úsh kúdikti ustaldy, dep habarlaıdy infohub.kz saıty.
İİM aqparattyq medıaportalynyń málimetinshe, Jambyl oblysy polısıa departamentiniń esirtki qylmysyna qarsy is-qımyl basqarmasynyń qyzmetkerleri QR İİM kóliktegi polısıa departamentiniń áriptesterimen, №5513 áskerı bóliminiń «Berkýt» arnaıy maqsattaǵy jasaǵynyń áskerı qyzmetshilerimen jáne Jambyl oblysy PD kınologıalyq ortalyǵynyń ınspektor-kınologymen birlesip, oblys prokýratýrasynyń úılestirýimen jedel-izdestirý is-sharalaryn júrgizdi.
Esirtkini izdeýge Letta esimdi qyzmettik-izdestirý ıti jumyldyryldy.
Jedel is-sharalar nátıjesinde Qonaev aýylynan shamamen 10 shaqyrym jerdegi qumdy aımaqta polıseıler úsh er adamdy ustady. Olar aldyn ala derekter boıynsha, erekshe iri mólsherde esirtki quramdas ósimdikterdi zańsyz jınaýmen aınalysqan. Aýmaqty tekserý kezinde polıseıler 595 keli 440 gram esirtki zattary men esirtki quramdas ósimdikterdi tárkiledi. Sonymen qatar, ósimdikterdi jınaýǵa paıdalanylýy múmkin úsh oraq alyndy.
Osy fakti boıynsha sotqa deıingi tergeý bastaldy. Kúdiktiler ýaqytsha ustaý ızolátoryna qamaldy.