Jambyl oblysynda jol-kólik oqıǵasynan keıin materıaldyq zalaldy óndirip alý týraly daý taraptardyń tatýlasýymen aıaqtaldy, dep habarlaıdy infohub.kz.
Jambyl oblysy sottarynyń resmı Telegram-arnasynda habarlanǵandaı, Talas aýdandyq soty jol-kólik oqıǵasynda zaqymdanǵan avtomobıldiń materıaldyq zalalyn jáne taýarlyq qunynyń joǵalýyn óndirip alý týraly azamattyq is boıynsha taraptardy tatýlastyrdy.
Bastapqyda talapker Astana qalasynyń azamattyq ister jónindegi aýdanaralyq sotyna júgingen, alaıda keıin taraptar eksterrıtorıaldy sottylyqty qoldaný týraly ótinish bildirgen. Sot uıǵarymymen is Jambyl oblysynyń Talas aýdandyq sotyna qaraýǵa jiberildi.
2026 jylǵy aqpanda Astanada Toyota Yaris jáne Volkswagen Tiguan kólikteriniń qatysýymen jol-kólik oqıǵasy bolǵan. Jaýapker ákimshilik jaýapkershilikke tartylǵan. Saqtandyrý kompanıasy talapkerge 2,6 mln teńge tólegen. Alaıda, esep boıynsha, avtomobıldi jóndeý quny 3,2 mln teńgeden asqan. Sonymen qatar, avtomobıl taýarlyq qunyn joǵaltqan. Talapker jaýapkerden saqtandyrý tólemi men naqty zalal arasyndaǵy aıyrmashylyqty 1,6 mln teńge kóleminde óndirip alýdy suraǵan.
Sot talqylaýy barysynda taraptar medıasıa tártibimen ózara kelisimge kelgen. Kelisim sharttary boıynsha jaýapker sot uıǵarymy zańdy kúshine engenge deıin talapkerge 1,3 mln teńge tóleýge mindettengen. Talapker talap qoıýdan bas tartqan. Atalǵan soma tólenbegen jaǵdaıda talapker 1,6 mln teńgeni óndirip alýǵa atqarý paraǵyn alýǵa quqyly.
Sot kelisimdi bekitip, is boıynsha is júrgizýdi toqtatqan. Talapkerge memlekettik baj qaıtarylǵan. Uıǵarym zańdy kúshine engen.