Jambyl oblysynda bolǵan jol-kólik oqıǵasynda tórt adam qaza tapty. Áleýmettik jelilerde kóliktiń birin belgili sportshy, burynǵy polısıa qyzmetkeri Saıa Áýelbekova basqarǵan bolýy múmkin degen aqparat tarady, dep habarlaıdy infohub.kz saıty.
Halyqstan Telegram-arnasynyń málimetinshe, Merki aýdanyndaǵy Qostógen aýylyna kireberiste vnedorojnık «Jıgýlı» kóligine soǵylǵan, onyń júrgizýshisi oqıǵa ornynda qaza tapqan. Kýágerlerdiń aıtýynsha, 27 jastaǵy jigit anasyn alyp qaıtýǵa shyqqan, biraq ol ulyn kútip ala almaǵan. Jas jigit onyń jalǵyz uly bolǵan.
«Birinshi kóliktiń rólinde sportshy, kópbalaly ana, Qostanaı oblysy polısıa departamentiniń burynǵy qyzmetkeri Saıa Áýelbekova boldy. Apatta vnedorojnıktiń úsh jolaýshysy da qaza tapty. Aýyl turǵyndarynyń jazýynsha, olardyń bireýi Áýelbekovanyń týysy. Qaza tapqan jigittiń týystary áıeldiń jazadan qutylyp ketýinen qorqady, sebebi ol burynǵy bolsa da polısıa qyzmetkeri, sondyqtan ádil tergeý talap etedi», — delingen jazbada.
Threads jelisinde de JKO týraly habarlama paıda boldy. «Merki aýdanynda qaza tapqandar bar JKO boldy, shamamen kóliktiń birin Saıa Áýelbekova basqarǵan — ol qazaqstandyq polısıa qyzmetkeri (SOBR ınspektory), bes balanyń anasy jáne Qaznette «batyr ana» dep atalatyn belgili jekpe-jek sportshysy», — dep jazylǵan jazbada.
Jambyl oblysy polısıa departamentiniń NUR.KZ tilshisine habarlaýynsha, 20 qyrkúıekte Merki aýdanynyń Qostógen aýylynda JKO bolyp, saldarynan 4 adam qaza tapqan. Jol-kólik oqıǵasy faktisi boıynsha qylmystyq is qozǵaldy.
«Aldyn ala derekterge sáıkes, Tank 500 kóliginiń júrgizýshisi qarsy jolaqqa shyǵyp, «VAZ-2107» kóligimen soqtyǵysqan. Jol-kólik oqıǵasynyń saldarynan «VAZ» júrgizýshisi men vnedorojnıktiń 3 jolaýshysy qaza tapty», — dedi vedomstvonyń baspasóz qyzmeti.
Tank kóliginiń júrgizýshisi aýdandyq aýrýhanaǵa jatqyzyldy. «Ol ishki ister organdarynyń qyzmetkeri emes», — dep málimdedi polısıada. İs Jambyl oblysy PD óndirisine berildi. Qazirgi tańda bolǵan oqıǵanyń barlyq mán-jaıyn obektıvti anyqtaýǵa baǵyttalǵan tergeý áreketteri jalǵasýda.
«Tergeý barysy PD basshylyǵynyń baqylaýynda. Tergeý nátıjeleri boıynsha qoldanystaǵy zańnamaǵa sáıkes tıisti prosestik sheshim qabyldanady», — dep qorytyndylady vedomstvoda.
Sonymen qatar Saıa Áýelbekovanyń Instagram paraqshasynda onyń qaryndasynyń atynan jazba paıda boldy, onda sportshynyń JKO-ǵa tap bolǵany habarlandy. «Qaryndasym aýyr apatqa tap boldy. Qazir aýyr jaǵdaıda jatyr. Ol qarsy shyqqan kólikten qutylýǵa tyrysyp, sonyń saldarynan apatqa ushyrady. Bes kishkentaı balasy jetim qalmaýy úshin ony qoldaýlaryńyzdy suraımyn», — delingen jarıalanymda.