Jambyl oblysynda er adam qaıtys bolǵan anasynyń ultyn sot arqyly qalpyna keltirdi. Sot «Azamattarǵa arnalǵan úkimet» memlekettik korporasıasyn tıisti ózgerister engizýge mindettedi, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, mamandandyrylǵan aýdanaralyq ákimshilik sot azamattyń «Azamattarǵa arnalǵan úkimet» memlekettik korporasıasyna anasynyń ulty bóliginde týý týraly akt jazbasyna ózgerister engizý týraly talap aryzy boıynsha isti qarady.
Talapker týylǵan kezde akt jazbasynda onyń anasynyń ulty «orys» dep kórsetilgen. Alaıda sot zerttegen qujattar talapkerdiń anasynyń ata-anasy ulty boıynsha chehoslovak pen nemis bolǵanyn rastady. Demek, «Neke (erli-zaıyptylyq) jáne otbasy týraly» kodekstiń talaptaryna sáıkes, anasynyń týǵan kezdegi ulty «cheh» nemese «nemis» dep kórsetilýi tıis edi.
Buǵan deıin memlekettik korporasıa tıisti ózgerister engizýden bas tartqan bolatyn. Anasy qaıtys bolǵannan keıin onyń jeke derekterine ózgerister engizý zańnamada kózdelmegen, bul talapkerdiń óz ulty týraly málimetterdi ózgertý múmkindiginen is júzinde aıyrǵan.
Buzylǵan quqyqty qorǵaýdyń ózge tásiliniń bolmaýyn, sondaı-aq ádildik pen parasattylyq qaǵıdattaryn basshylyqqa ala otyryp, sot talap aryzdy qanaǵattandyrdy.
Sot sheshimimen jaýapkerge talapkerdiń týý týraly akt jazbasyna túzetýler engizý, anasynyń ultyn «orys» degennen «cheh» dep ózgertý mindeti júkteldi.
Sondaı-aq sot sheshim bir aı merzimde oryndalmaǵan jaǵdaıda jaýapkerden 50 AEK mólsherinde aqshalaı óndirip alýǵa ákep soǵatynyn kórsetti.
Sheshim zańdy kúshine engen joq.