Instagram-да 25 мың теңгеге түсірілген жарнамалық бейнеролик жауапкершілігі шектеулі серіктестікке 1,5 миллион теңгеден астам айыппұл әкелді. Жамбыл облысының соты компанияны Қазақстанның жарнама туралы заңнамасына сай келмейтін букмекерлік кеңсе жарнамасын қайталап таратқаны үшін кінәлі деп таныды, деп хабарлайды infohub.kz сайты.
Жамбыл облысы соттарының ресми Telegram-арнасында мәлім болғандай, Қазақстан Республикасының жарнама туралы заңнамасының талаптарына сай келмейтін букмекерлік кеңсе жарнамасын қайталап тарату фактісі бойынша жауапкершілігі шектеулі серіктестікке қатысты әкімшілік құқық бұзушылық туралы іс апелляциялық тәртіппен қаралды (Әкімшілік құқық бұзушылық туралы кодекстің 455-бабының 6-бөлігі).
Байзақ аудандық соты анықтағандай, 2026 жылдың маусымында Instagram желісіндегі пайдаланушының парақшасында букмекерлік кеңсенің тауарлық белгісі бар жарнамалық бейнеролик жарияланған. Онда пайдаланушыларға депозитті толықтырғаны үшін бонус алу ұсынылған. Бұған дейін, 2025 жылдың қыркүйегінде серіктестік осындай бұзушылық үшін жауапкершілікке тартылған.
Серіктестік өкілі кінәні мойындамады. Оның айтуынша, бейнероликтің авторы компания қызметкері емес, ал серіктестік оны дайындауға тапсырыс бермеген.
Сот жарияланған тауарлық белгінің Қазақстан аумағындағы жалғыз құқық иесі — осы серіктестік екенін анықтады. Сонымен қатар куәгер жарнамалық роликті жасауға тапсырысты Instagram арқылы алғанын және оны 25 мың теңгеге жариялағанын растады.
Бірінші сатыдағы сот жауапкершілікті жеңілдететін де, ауырлататын да мән-жайларды анықтаған жоқ. Әкімшілік құқық бұзушылық туралы кодекстің 455-бабының 6-бөлігіндегі санкция шағын кәсіпкерлік субъектілеріне 350 айлық есептік көрсеткіш мөлшерінде айыппұл қарастырады.
Байзақ аудандық сотының қаулысымен серіктестік кінәлі деп танылып, оған 1,5 миллион теңгеден астам айыппұл тағайындалды. Серіктестік сот актісіне шағымданғанымен, апелляциялық алқа қаулыны өзгеріссіз қалдырды. Сот актілері заңды күшіне енді.