Jambyl oblysynda quqyq qorǵaý organdary zańsyz kóshi-qon arnasyn uıymdastyrdy degen kúdikti tórt adamdy anyqtap, ustady, dep habarlaıdy infohub.kz saıty.
NUR.KZ agenttiginiń oblystyq prokýratýraǵa silteme jasap habarlaýynsha, zańsyz kóshi-qon faktileriniń jolyn kesý úshin Qordaı aýdanynyń prokýratýrasy Ulttyq qaýipsizdik jáne ishki ister organdarynyń qyzmetkerlerin tartyp, vedomstvoaralyq tergeý-jedel tobyn qurdy.
Kelisilgen tergeý-jedel sharalarynyń nátıjesinde Almaty aýmaǵynda aǵymdaǵy jyldyń mamyr–shilde aılarynda Qazaqstan Respýblıkasynyń memlekettik shekarasyn belgilengen ótkizý pýnktterinen tys jerden zańsyz kesip ótken Qyrǵyzstan men Ózbekstannyń 10 azamaty anyqtaldy.
Zańsyz kóshi-qon arnasyn uıymdastyrdy degen kúdikpen 4 adam áshkerelenip, ustaldy. Olardyń 3-eýi — Qazaqstan, 1-eýi — Qyrǵyzstan azamaty.
«Sotqa deıingi tergeý materıaldary boıynsha, Qyrǵyz Respýblıkasynyń azamaty sheteldikterdi memlekettik shekaraǵa deıin alyp barǵan, odan keıin Qazaqstan aýmaǵynda olardy Almatyǵa deıin tasymaldaýdy qamtamasyz etken sybaılastary qarsy alǵan», — dedi Jambyl oblysynyń prokýratýrasynda.
Barlyq kúdiktige qamaýǵa alý túrindegi bultartpaý sharasy qoldanyldy. Osy fakti boıynsha QR Qylmystyq kodeksiniń 394-babynyń 2-bóligimen sotqa deıingi tergeý júrgizilýde.