Qazaqstan Prezıdenti Qasym-Jomart Toqaev «Qazaqstan — Qytaı» ınvestısıalyq forýmy aıasynda beınebaılanys arqyly júgerini tereń óńdeıtin zaýyttyń ashylý rásimine qatysyp, Jambyl oblysynda ónerkásiptik park qurylysynyń bastaýyn berdi. İs-sharaǵa Jambyl oblysynyń ákimi Erbol Qarashúkeev te qatysty, dep habarlaıdy infohub.kz saıty.
«Búgin biz aımaq ekonomıkasy úshin mańyzdy oqıǵaǵa kýá bolyp otyrmyz. Qysqa merzimde munda zamanaýı óndiris qurylyp, ol agroónerkásip keshenine, qaıta óńdeý salasyna jáne bizdiń aýyl sharýashylyǵy taýaryn óndirýshilerge jańa múmkindikter ashyp otyr. Bul joba iri ınvestısıalardyń aımaqqa kelip jatqanyn, jańa óndirister, jumys oryndary men ekonomıkalyq ósý núkteleri qurylyp jatqanyn aıqyn kórsetedi», — dedi Erbol Qarashúkeev.
İske qosylǵan kásiporyn Ortalyq Azıadaǵy amınqyshqyldaryn shyǵaratyn alǵashqy zaýyt boldy. Jobanyń úsh kezeńiniń barlyǵyn júzege asyrýǵa shamamen 1,5 mlrd dollar ınvestısıa tartý josparlanýda. 1 500-ge jýyq jumys ornyn ashý kózdelgen. Birinshi kezeńde kásiporyn jylyna 500 myń tonna júgeri óńdeıdi. Tolyq jobalyq qýatqa shyqqan soń óńdeý kólemin jyl saıyn 3 mln tonnaǵa jetkizý josparlanýda.
Zaýyt amınqyshqyldaryn shyǵarýǵa mamandanǵan. Negizgi ónimderdiń qatarynda — ızoleısın, leısın, valın, treonın jáne glýtamın. Olardyń keıbireýi adam aǵzasy úshin asa mańyzdy. Kásiporyn ónimi taǵam jáne farmasevtıka ónerkásibinde, bıotehnologıa salasynda, sondaı-aq arnaıy taǵam men jem qospalaryn óndirýde suranysqa ıe. Daıyn ónimniń 80%-y eksportqa jiberilip, 20%-y ishki naryqta satylady dep kútilýde.
«Shengtai Biotech — Fufeng kompanıasynyń Qytaıdan tys jerde salǵan alǵashqy óndiristik kesheni. Kásiporyn jumysy úshin shıkizattyń aıtarlyqtaı kólemi qajet. Birinshi kezeńde shamamen 500 myń tonna júgeri satyp alýdy josparlap otyrmyz. Bul jergilikti aýyl sharýashylyǵy taýaryn óndirýshiler úshin jańa ári turaqty ótkizý naryǵyn qurady. Sondyqtan biz aımaq agrarılerimen yntymaqtastyqqa múddelimiz jáne olardy júgeri egis alqaptaryn ulǵaıtyp, ónimdi zaýytqa ótkizýge shaqyramyz», — dedi «SHENGTAI BIOTECH CO., LTD» JSHS basshysy Van Iandýn.
Aımaq basshysynyń aıtýynsha, kásiporynnyń iske qosylýy oblys agrarıleri úshin de erekshe mańyzǵa ıe. «Biz úshin óndiris kólemin ulǵaıtý ǵana emes, aımaq ishinde tolyqqandy óńdeý tizbegin qalyptastyrý da mańyzdy. Zaýyt júgerige turaqty suranys quryp, aýyl sharýashylyǵy taýaryn óndirýshilerdi turaqty ótkizý naryǵymen qamtamasyz etedi jáne qosylǵan quny joǵary básekege qabiletti ónim shyǵarýǵa múmkindik beredi. Túptep kelgende, munyń bári ekonomıkany damytýǵa jáne oblys turǵyndarynyń ál-aýqatyn arttyrýǵa qyzmet etýi tıis», — dep atap ótti Erbol Qarashúkeev.
Jambyl oblysy ınvestısıa tartý jáne jańa óndirister qurý baǵytyndaǵy júıeli jumysyn jalǵastyryp keledi. Búginde aımaqtyń ınvestısıalyq portfeli jalpy quny 5,6 trln teńge bolatyn 116 jobany qamtıdy. Olardy júzege asyrý 20 myńnan astam jańa jumys ornyn ashýdy kózdeıdi. 2026 jyldyń segiz aıynda oblys ekonomıkasyna 621,4 mlrd teńge ınvestısıa tartylyp, ótken jyldyń sáıkes kezeńimen salystyrǵanda 48,7%-ǵa artqan. Bıyl jalpy quny 471 mlrd teńge bolatyn 47 ınvestısıalyq jobany júzege asyrý josparlanýda.