Jumys berýshiniń jańa mindetti zeınetaqy jarnasy esebinen qalyptasqan zeınetaqy jınaqtarynyń bir bóligi sońǵy bir jylda ınflásıa 10,2% bolǵan kezde 19,12% ınvestısıalyq kiris ákeldi, dep habarlaıdy infohub.kz saıty.
Biryńǵaı jınaqtaýshy zeınetaqy qorynda (BJZQ) saqtalatyn qazaqstandyqtardyń zeınetaqy jınaqtary ınvestısıalyq kiris alý úshin basqarýshy kompanıalar tarapynan únemi ınvestısıalanyp otyrady. BJZQ derekterine sáıkes, 2026 jylǵy 1 tamyzdaǵy jaǵdaı boıynsha mindetti, mindetti kásiptik jáne erikti zeınetaqy jarnalary (MZJ, MKZJ jáne EZJ) esebinen qalyptasqan qarajattyń basym bóligin Qazaqstan Ulttyq banki basqarady – 26,933 trln teńge. Jyl basynan beri onyń ınvestısıalyq qyzmeti nátıjesinde zeınetaqy aktıvteriniń kiristiligi 4,39%-dy, al bir jylda 7,13%-dy qurady. Al osy kezeńdegi ınflásıa jyl basynan beri 5,7%, al bir jylda 10,2% boldy.
Jumys berýshiniń mindetti zeınetaqy jarnasynyń (JMZJ) ınvestısıalaý nátıjeleri erekshe kózge tústi. Bul qarajat qazaqstandyqtardyń shartty shottarynda saqtalady jáne bolashaqta jańa tólemderdi qalyptastyratyn bolady. JMZJ-ny da Ulttyq bank ınvestısıalaıdy – qazir onyń basqarýynda 1,273 trln teńge bar. Jyl basynan beri kiristilik 10,84%-dy, al bir jylda 19,12%-dy qurady, bul sol kezeńdegi baǵa ósiminen eki ese derlik kóp.
Aıta ketý kerek, JMZJ tek teńgemen salynady, al teńge sońǵy bir jylda aıtarlyqtaı nyǵaıdy.
Sondaı-aq qazaqstandyqtar zeınetaqy jınaqtarynyń bir bóligin ınvestısıalyq portfeldi basqarýshylarǵa (IPB) senip tapsyra alady. Eske salaıyq, 7 qyrkúıekten bastap olarǵa BJZQ-daǵy barlyq aktıvterin senip tapsyrýǵa bolady. Olardyń 2026 jylǵy 1 tamyzdaǵy qyzmet nátıjeleri tómendegideı:
«Halyq Bankiniń enshiles uıymy» AQ «Halyk Finance» (basqarýynda – 71,88 mlrd teńge) jyl basynan beri 6,34%, al bir jylda 9,34% kiris ákeldi; «Alatau City Invest» AQ (basqarýynda – 21,67 mlrd teńge) jyl basynan beri 5,55%, al bir jylda 10,99% kiris ákeldi; «Sentras Sekúrıtız» AQ (basqarýynda – 18,92 mlrd teńge) jyl basynan beri 9,72%, al bir jylda 15,63% kiris ákeldi – bul IPB-lar arasyndaǵy eń joǵary nátıje; «BCC Invest» AQ (basqarýynda – 17,74 mlrd teńge) jyl basynan beri 6,24%, al bir jylda 9,35% kiris ákeldi; «Halyk Global Markets» AQ (basqarýynda – 6,72 mlrd teńge) jyl basynan beri 6,11%, al bir jylda 10,56% kiris ákeldi; «Tansar Capital» AQ (basqarýynda – 568,2 mln teńge) 2026 jylǵy 8 sáýirden bastap 1,13% kiris ákeldi.
Eske salaıyq, Tansar Capital – jańa basqarýshy, al Halyk Global Markets, kerisinshe, endi jańa zeınetaqy jınaqtaryn qabyldamaıdy jáne 2027 jyldan bastap eskilerin basqarýdy toqtatady – olar Ulttyq bankke beriledi.
Osylaısha, Ulttyq bank MZJ, MKZJ jáne EZJ basqarýdan eń tómen kiristilikti, al jańa mindetti zeınetaqy jarnasynan eń joǵary kiristilikti kórsetti. Inflásıany IPB-lardyń jartysy ǵana basyp ozdy.