Qazaqstandyq sportshy, qostanaılyq Janıa Bekmýhambetova Ózbekstan astanasy Tashkentte ótip jatqan WTT Youth Contender Tashkent II halyqaralyq ústel tenısi týrnırinde jeńiske jetti. 13 jasqa deıingi sanatta ol barlyq kezdesýlerde jeńilissiz ótip, altyn medaldi ıelendi, dep habarlaıdy infohub.kz.
Qazaqstan Respýblıkasy Ústel tenısi federasıasynyń málimetinshe, Janıa Bekmýhambetova bapker Iýlıa Danıarovanyń jetekshiligimen týrnırdi senimdi túrde ótkizip, qatarynan jeti jeńiske qol jetkizdi. Chempıon ataǵyna deıingi jolda ol tórt ózbekstandyq, eki úndistandyq jáne bir túrikmenstandyq qarsylasty tize búktirip, joǵary deńgeıdegi daıyndyǵy men sheberligin dáleldedi.
WTT Youth Contender Tashkent II týrnırindegi bul jeńis qazaqstandyq sportshylardyń halyqaralyq arenadaǵy taǵy bir tabysty óneri bolyp, Qazaqstan quramasyna ústel tenısinen bedeldi jastar týrnıriniń altyn medalin ákeldi.