2015 jyly atylǵan reseılik saıasatker Borıs Nemsovtyń qyzy Janna Nemsova Reseıdiń shetel agentteri tizimine engizildi. Bul týraly Reseı Ádilet mınıstrliginiń baspasóz qyzmeti habarlady, dep jazady infohub.kz.
Vedomstvonyń málimetinshe, shetel agentteri tizimine qoǵam qaıratkeri Janna Nemsovadan bólek advokat Rýstam Hýajev, «Komanda Navalnogo» aqparattyq resýrsy jáne «Reanımasıa» aqparattyq resýrsy qosylǵan.
Reseı Ádilet mınıstrliginiń tujyrymy boıynsha, Nemsova «Reseı Federasıasynyń memlekettik bılik organdary qabyldaǵan sheshimder men júrgizip otyrǵan saıasaty týraly jalǵan aqparat taratqan», sondaı-aq Ýkraınadaǵy soǵysqa qarsy shyqqan.
«Shetel agentteriniń habarlamalary men materıaldaryn shekteýsiz adamdar tobyna jasaýǵa jáne taratýǵa qatysqan. Qyzmeti Reseı Federasıasynyń aýmaǵynda qalaýsyz dep tanylǵan sheteldik jáne halyqaralyq uıymdardyń tizimine engizilgen uıymnyń negizin qalaýshysy. Shetel agentterimen ózara árekettesedi, Reseı Federasıasynyń sheginen tys jerde turady», — delingen vedomstvo habarlamasynda.
«Borıs Nemsov atyndaǵy Bostandyq qory» saıtynyń dereginshe, Janna Nemsova qordyń teń quryltaıshysy jáne Karl ýnıversıtetiniń fılosofıa fakúltetindegi Borıs Nemsov atyndaǵy Reseıdi zertteý akademıalyq ortalyǵynyń teń dırektory. Ol bilim berý jáne áleýmettik mańyzy bar jobalardy iske asyrýda kópjyldyq tájirıbege ıe.
2015–2020 jyldary Nemsova álemdik saıasatty jarıalap, nemistiń Deutsche Welle qoǵamdyq telearnasynda orys tilindegi «Nemsova. Intervú» baǵdarlamasyn júrgizgen. Buryn reseılik jekemenshik RBK iskerlik telekompanıasynda ekonomıkalyq sholýshy bolyp, qarjy naryqtaryn jarıalap, jetekshi saıasatkerler men ekonomıserden suhbat alǵan.
Ol sondaı-aq Crooked Media-daǵy aǵylshyn tilindegi Another Russia narratıvti podkastynyń teń júrgizýshisi jáne 2022 jyldyń qańtarynda Reseıde jaryq kórgen «Ákesiniń qyzy» atty orys tilindegi bestsellerdiń avtory.