Qyrǵyzstan prezıdenti Sadyr Japarov 2027 jylǵy 27 qańtarǵa belgilengen memleket basshysyn saılaý týraly jarlyqqa qol qoıdy. Qujat búdjet salasy qyzmetkerlerin saılaýaldy úgitke tartýǵa tikeleı tyıym salady, dep habarlaıdy infohub.kz saıty.
Prezıdentti erkin jáne ashyq saılaýdy qamtamasyz etý jónindegi sharalar týraly jarlyqqa sáıkes, kandıdattardyń paıdasyna úgit júrgizýge muǵalimderdi, oqýshylardy, oqytýshylardy, stýdentterdi, medısına qyzmetkerlerin, áleýmettik qyzmet qyzmetkerlerin, sondaı-aq ózge de memlekettik jáne mýnısıpaldyq uıymdardyń qyzmetkerlerin tartýǵa tyıym salynady.
Mınıstrler kabınetine úgitke zańsyz qatysatyn ne qyzmet babyn kandıdattardyń múddesine paıdalanatyn laýazymdy tulǵalardy tártiptik jaýapkershilikke tartý tapsyryldy. Qajet bolǵan jaǵdaıda mundaı basshylar men qyzmetkerler atqaratyn laýazymdarynan bosatylady.
«Jarlyq sondaı-aq memlekettik jáne mýnısıpaldyq organdardyń saılaý prosesine aralasýynyń jáne ákimshilik resýrsty paıdalanýynyń aldyn alýǵa baǵyttalǵan. Ortalyq saılaý komısıasyna zańnamany birkelki qoldaný jáne azamattardy habardar etý úshin qosymsha sharalar qabyldaý usynyldy. Qujat Qyrǵyzstan zańnamasyna sáıkes halyqaralyq baıqaýshylardyń qatysýyn kózdeıdi», — delingen habarlamada.
Eske salaıyq, shamamen bir aı buryn Sadyr Japarov 2027 jyldyń qańtarynda ótetin el prezıdentin saılaýǵa qatysatynyn resmı túrde rastaǵan bolatyn.