Japonıanyń Hokkaıdo prefektýrasynda analyq aıý qonjyǵyn qorǵaý maqsatynda toqtap turǵan kólikti birneshe ret soqqylady, dep habarlaıdy infohub.kz saıty.
Oqıǵa túnde Bıfýka eldi mekeniniń mańynda boldy. Jeńil kólik tizgindegen 30 jastaǵy áıel jolda eki aıýdy — eresek analyq aıý men onyń qonjyǵyn — baıqap, kóligin birden toqtatty. Alaıda analyq aıý kólikti qaýip retinde qabyldady.
Beınejazbada iri janýardyń kólikke tap berip, kapotynyń aldyńǵy bóligine birneshe ret kúshpen soǵylǵany kórinedi.
Shabýyl saldarynan kólikke aıtarlyqtaı zaqym keldi: kapotta tereń maıysqan izder, tyrnaqtardan qalǵan syzattar, tipti tesik paıda boldy. Salonda otyrǵan áıel zardap shekpedi. Birneshe soqqydan keıin jabaıy janýar qonjyǵymen birge ormanǵa qashyp ketti.
Hokkaıdo polısıasy jergilikti turǵyndar men júrgizýshilerdi qaýipten saqtandyrý úshin beınejazbany jarıalady. Kúzde jabaıy aıýlar qysqy uıqyǵa jatar aldynda azyq izdep, ásirese belsendi bolady. Bılik taýly aımaqtaǵy patrúldeýdi kúsheıtýge májbúr boldy, al avtokólik júrgizýshilerine qarańǵy ýaqytta jol júrgende erekshe saq bolý usynylady.