Japonıanyń shyǵysynda bolǵan «teńdesi joq» nóser saldarynan keminde tórt adam qaza taýyp, Tokıodaǵy Narıta áýejaıynda 7 myńǵa jýyq adam qamalyp qaldy. Taǵy myńdaǵan adam memlekettik ǵımarattarǵa panalaýǵa májbúr boldy. Bul týraly infohub.kz saıty habarlaıdy.

Beısenbi kúni túnde Tokıonyń shyǵysyndaǵy Chıba prefektýrasynda nóser jańbyr jaýyp, kóshkin qaýpi men elektr jaryǵynyń sónýine sebep boldy. Chıba jáne basqa aımaqtarda 400 myńnan astam adamǵa evakýasıa týraly buıryq berildi, shamamen 45 myń úı jaryqsyz qaldy. Saǵatyna 115 mıllımetr jańbyr jaýdy — bul tamyz aıyndaǵy ortasha aılyq mólshermen birdeı.

Japonıa meteorologıalyq agenttigi osy prefektýra úshin nóser men kóshkin qaýpine baılanysty eń joǵary 5-deńgeıli eskertýdi alǵash ret jarıalady.

Ichıkava qalasynda sý basqan jolda 60-70 jas shamasyndaǵy er adamnyń denesi tabyldy, al Sakýra qalasynda kóligi sý astynda qalǵan 66 jastaǵy áıel qaza tapty. Taǵy eki adam sý tasqyny kezinde kólikterinen shyǵa almaı qaza tapqany habarlandy. Qutqarý jumystaryna áskerıler jumyldyryldy.

«Bul óte erekshe jaǵdaı», — dedi Chıba gýbernatory Tosıhıto Kýmagaı juma kúni tańerteń jýrnalıserge. «Men buryn kóptegen apattarǵa tap boldym, biraq mundaı jaǵdaıdy eshqashan kórmeppin».

Tokıonyń negizgi halyqaralyq áýejaılarynyń biri Narıtada shamamen 7 myń jolaýshy túndi ótkizdi, al 1700 adam Chıba prefektýrasynyń ǵımaratynan pana tapty.

Qoǵamdyq telearna NHK-diń kadrlarynda Chıbanyń ortalyq aýdanyndaǵy káriz lúginen sý atqylap, jaqyn mańdaǵy bes qabatty ǵımarattan bıikke kóterilgeni kórindi.

Juma kúni jańbyr basyldy, biraq bılik aımaqta sý tasqyny qaýpi týraly eskertýde.

«Sý tasqyny qaýpi joǵary ózenderde ómirińizdi qorǵaý úshin barlyq sharany qoldanyńyz», — dedi jer, ınfraqurylym, kólik jáne týrızm mınıstrliginiń ókili Kadzýhıto Shımamoto. «Sondaı-aq sý tasqyny qaýpi odan ári artýy múmkin ózender bar, sondyqtan jergilikti ákimdikterdiń evakýasıa týraly eskertýlerin tekserip, aldyn ala evakýasıalanyńyz».

Japonıanyń meteorologtary klımattyń ózgerýi ekstremaldy aýa raıy oqıǵalarynyń jıiligi men qarqyndylyǵyn arttyryp jatqanyn aıtady.