Japondyq PorMedTec startapy elde alǵash ret adamdarǵa shoshqa búıregin aýystyryp salý boıynsha klınıkalyq synaqtardy 2028 jyly bastaýdy josparlap otyr, dep habarlaıdy infohub.kz saıty.
Ǵalymdar organdardyń qabyldanbaý qaýpin azaıtý úshin DNQ-da 69 ózgerisi bar genetıkalyq ózgertilgen shoshqalardy ósirip jatyr. Alǵashqy synaqtardy 2028 jyly bastaý josparlansa, 2033 jylǵa qaraı mundaı aýystyryp salýlar Japonıada standartty emdeý ádisine aınalady dep kútilýde.
«Biz muny aýyr búırek jetkiliksizdigimen aýyratyn naýqastar úshin adamnan adamǵa organ transplantasıasy jáne dıalızben qatar emdeý nusqasy retinde ilgeriletkimiz keledi», — dedi startap prezıdenti Gendzıro Mıva.
Onyń aıtýynsha, 2027 qarjy jylynyń sońyna qaraı aýrýhanalarǵa jaqyn jerde shoshqa búırekterin alý ortalyqtary qurylady. Startap 2030 jyly adamǵa shoshqa búıregin transplantasıalaýǵa shartty ruqsat alýdy jáne 2033 jylǵa qaraı bul prosedýrany standartty emdeý ádisine aınaldyrýdy josparlap otyr.
Buǵan deıin qytaılyq dárigerler álemde alǵash ret adamǵa genetıkalyq modıfıkasıalanǵan shoshqanyń úsh múshesin – baýyr men eki búırekti birden aýystyryp saldy. Aýystyryp salynǵannan keıin barlyq úsh múshe birden jumys isteı bastady: baýyr bir táýlikten az ýaqytta ót bóle bastasa, búırekter dereý óz qyzmetin atqara bastady.
2022 jyly AQSH-ta naýqasqa alǵash ret genetıkalyq modıfıkasıalanǵan shoshqanyń júregi aýystyrylyp salyndy. Er adam operasıadan keıin eki aı ómir súrdi. 2024 jyly amerıkandyq hırýrgter tiri adamǵa alǵash ret shoshqa búıregin aýystyryp saldy.