Japonıada seısenbide bolǵan iri jer silkinisinen qaza tapqandar sany 17-ge jetti, dep habarlaıdy infohub.kz saıty.
Kúsú aralyndaǵy Kýmamoto prefektýrasynda bolǵan 6,8 baldyq jer silkinisi keminde 62 adamdy jaralady, dep málimdedi prefektýra ákimshiligi. Jaralanǵandar sany ósip, bul alańdaýshylyq týdyrýda. Prefektýraǵa 5 myńǵa jýyq Qorǵanys kúshteriniń qyzmetkeri jiberildi. Beısenbide aýa temperatýrasy 35°C-qa deıin kóterilýi qutqarý jumystaryn qıyndatýda. Túnde 5,8 baldyq qaıtalanǵan dúmpý de jaǵdaıdy ýshyqtyrdy.
Kasıma qalasyndaǵy «Aeon» saýda ortalyǵynda 170-ke jýyq qutqarýshy izdeý jumystaryn júrgizýde. Jer silkinisi kezinde myńdaǵan adam bolǵan saýda ortalyǵynyń bir bóliginde gaz jarylysy boldy. Segiz adam qıraǵan ǵımarat astynan shyǵaryldy, onyń úsheýi qaza tapty. Japonıa telearnalarynyń kórsetýinshe, saýda ortalyǵynyń tóbesi qulap, metal bólshekteri shashylyp jatqan. Dýlyǵa kıgen, maska taqqan qutqarýshylar aımaqty qarqyndy tekserýde.
Vetnam azamaty jumys isteıtin zaýytynda kran qulap, qaza tapty. Bul – shetel azamatynyń alǵashqy qazasy. Kýmamoto ákimshiliginiń málimetinshe, 34 myń 900-ge jýyq úı jaryqsyz, 15 myń úı sýsyz qaldy. 8 myń 800-den astam adam úılerin tastap, 400-den astam baspanaǵa ornalasty.
Polısıanyń áýe túsirilimi turǵyn úı aýdandaryndaǵy keıbir úılerdiń tolyǵymen tegistelgenin, tipti keıbiri ózenge qulaǵanyn kórsetti. Japonıa úkimetiniń basshysy Sanae Takaıtı: «Áli kútken adamdar bar, biz ýaqytpen jarysyp jatyrmyz. Qolymyzdan kelgenniń bárin jasap, múmkindiginshe kóp adamdy taýyp, qutqaramyz», – dedi.
Úkimet ókili sársenbide Kúsú aralynyń úsh aımaǵynda 506 baspanada 9 myńnan astam adam panalaǵanyn habarlady. Keıbir jergilikti turǵyndar bul jer silkinisin ómirlerinde sezingen eń kúshti dúmpý dep atady. 73 jastaǵy Kańdzo Masýmoto: «Bul men bastan ótkergen eń kúshti jer silkinisi», – dedi.
Japonıanyń geografıalyq aqparat basqarmasy jer asty dúmpýinen keıbir jer beti 87 sm-ge yǵysqanyn aıtty. Úkimet basshysy aımaqta ǵımarattar qırap, órtter men joldar búlingenin atap ótti. Kúsúdaǵy zaýyttary bar keıbir avtokólik jáne chıp óndirýshi kompanıalar sársenbide óndiristi toqtatty. Toyota kompanıasy jetkizýshiler men logıstıkaǵa áserdi baǵalaý úshin aımaqtaǵy úsh zaýytyn jumaǵa deıin toqtatatynyn habarlady.
Kúsú – Japonıanyń avtokólik jáne jartylaı ótkizgish ónerkásibiniń negizgi bazasy. Ol aımaqtyń ónerkásip óniminiń shamamen besten ekisin quraıdy. Sarapshylar zaýyttardyń jabylýy jumysshylarǵa qatysty saqtyq sharalary bolýy múmkin ekenin, óndiris quraldaryna zaqym kelgeninen emes ekenin aıtty.
Japonıa – eń seısmıkalyq belsendi elderdiń biri, Tynyq muhıtynyń «janartaý saqınasy» boıynda tórt iri tektonıkalyq plıtanyń ústinde ornalasqan. 2016 jyly Kýmamoto eki kúshti jer silkinisine ushyraǵan, ol kezde 273 adam qaza taýyp, 2 myń 800-den astam adam jaralanǵan. Shamamen 125 mıllıon halqy bar arhıpelag jyl saıyn júzdegen dúmpýdi bastan keshiredi jáne álemdegi jer silkinisteriniń shamamen 18 paıyzy osynda bolady.