Kandyaǵashtaǵy «Týmar» meıramhanasyndaǵy jappaı ýlanýdy sanıtarıalyq dárigerler tergep bitirdi. Olar stafılokokk, ishek taıaqshasy jáne birqatar buzýshylyqtardy anyqtady, dep habarlaıdy infohub.kz.
Kandyaǵashtaǵy «Týmar» meıramhanasyndaǵy jappaı ýlanýǵa qatysty epıdemıologıalyq tergeý aıaqtaldy. Qujattar quqyq qorǵaý organdaryna tapsyryldy.
Zerthanalyq zertteýler mekeme qyzmetkerlerinen Staphylococcus aureus, al as úı jabdyqtarynan, daıyn ónimderden jáne aýyz sý úlgisinen ishek taıaqshasy tobynyń bakterıalaryn anyqtady.
«Zerthanalyq zertteýler nátıjesinde ınfeksıa kózi bolyp tabylatyn meıramhana qyzmetkerlerinen Staphylococcus aureus tasymaldaýshylyǵy anyqtaldy. İshek taıaqshasy tobynyń bakterıalary jýyndylardan, as úı jabdyqtarynyń betterinen, tamaq ónimderiniń synamalarynan jáne aýyz sý úlgisinen tabyldy. Zardap shekkenderden stafılokokk pen ishek taıaqshasy anyqtaldy, bul stafılokokkty taǵamdyq toksıkoınfeksıa men jedel ishek ınfeksıalaryn kórsetedi», – dedi Aqtóbe oblystyq sanıtarıalyq-epıdemıologıalyq baqylaý departamenti basshysynyń orynbasary Janserik Qulmanov.
Tekserý kezinde mamandar sanıtarıalyq talaptardyń óreskel buzylýyn anyqtady. Meıramhanada taǵamdar tehnologıany buza otyryp daıyndalǵan, qaýipsizdigin rastaıtyn qujattary joq ónimder paıdalanylǵan, dezınfeksıa júrgizilmegen, al qyzmetkerler mindetti medısınalyq tekserýden ótpegen.
«Toptyq aýrý tirkelgen jaǵdaı boıynsha epıdemıologıalyq tergeý nátıjesinde materıaldar QR Qylmystyq kodeksiniń 304-baby 1-bóligi boıynsha quqyq qorǵaý organdaryna jiberildi», – dep qosty Qulmanov.
Meıramhanaǵa barǵannan keıin 100-den astam adam medısınalyq kómekke júgindi. Mekeme jumysy toqtatylyp, polısıa sotqa deıingi tergeýdi bastady. Barlyq zardap shekkender emdelip, aýrýhanadan shyǵaryldy.
Buǵan deıin Aqtóbe oblysynda Kandyaǵashtaǵy meıramhanaǵa barǵannan keıin ishek ınfeksıasy belgilerimen Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna 102 naýqas jatqyzylǵany habarlanǵan bolatyn. Polısıa qylmystyq is qozǵady. Keıin jatqyzylǵandar sany ósip, mekeme jabyldy.