Jetisý oblysynda júrgizýshi bóten memlekettik nómirdi paıdalanǵany úshin 5 táýlikke qamalyp, bir jylǵa kólik júrgizý quqyǵynan aıyryldy, dep habarlaıdy infohub.kz.
İİM aqparattyq medıaportalynyń málimetinshe, Jarkentte polısıa qyzmetkerleri basqa kólikke tıesili memlekettik tirkeý nómirimen júrgen kólikti anyqtaǵan.
Anyqtalǵandaı, Audi 100 kóliginiń júrgizýshisi óz avtokóligine Toyota Camry-diń memlekettik tirkeý nómirin ornatyp, qala kóshelerinde júrgen. Bul buzýshylyqty polısıa qyzmetkerleri anyqtaǵan. Kólik toqtatylyp, júrgizýshi jaýapkershilikke tartylyp, materıaldar sotqa jiberildi.
İsti qaraý nátıjesinde Panfılov aýdandyq soty júrgizýshini kináli dep tanyp, oǵan 5 táýlikke ákimshilik qamaýǵa alý jazasyn taǵaıyndady. Sonymen qatar, er adam bir jylǵa kólik júrgizý quqyǵynan aıyryldy. Jalǵan memlekettik tirkeý nómiri alynyp, belgilengen tártippen joıylýǵa tıis.