Kalıfornıa taýlarynda bir top álpınıs jasandy ıntellekttiń qate keńesi saldarynan qaýipti jaǵdaıǵa tap boldy, dep habarlaıdy infohub.kz saıty.
Týrıser Sıskıý okrýgindegi Shasta taýyna shyǵýdy josparlap, Google Gemini chat-botynyń keńesine tolyq senim artqan. Jasandy ıntellekt olardy shyńǵa shyǵý nebári segiz saǵat ýaqyt alatynyna sendirip, quramynda qarapaıym kómirsýlar bar jeńil taǵamdar alýdy usynǵan. Nátıjesinde álpınıser jyly kıimsiz jáne túneý quraldarynsyz, kishkentaı rúkzaktarmen jolǵa shyqqan.
Alaıda kóterilý ýáde etilgen segiz saǵattyń ornyna 16 saǵatqa sozylǵan. Olar shyńǵa kún batqannan keıin ǵana jetken, al qaıtar jolda marshrýttan adasqan. Jaǵdaıdy smartfonnyń zarády taýsylyp, baılanys pen navıgasıasyz qalýy odan ári qıyndatqan. Olar qutqarýshylardy shaqyrýǵa májbúr bolǵan, biraq qolaısyz aýa raıyna baılanysty tikushaqpen evakýasıalaý múmkin bolmaǵan.
İzdeý-qutqarý qyzmeti AQSh orman qyzmetimen birlesip, álpınıserdi jaıaý 9 saǵat boıy qutqarǵan. Joryqqa qatysýshylar jasandy ıntellektke tym senip, synı oılaýdy elemegenderin moıyndaǵan. Jergilikti sarapshylar marshrýttardy reındjerlerden naqtylaýdy jáne ekstremaldy is-sharalardy josparlaý úshin chat-bottardy paıdalanbaýdy qatań usynady.