1 qyrkúıekten bastap Qazaqstanda aýyl mektepterine jasandy ıntellekt engizý jónindegi pılottyq joba bastaldy. Alǵashqy kezeńde ol Pavlodar jáne Qyzylorda oblystaryndaǵy 10 oqý ornyn qamtydy. Bul týraly Q.AI bas dırektory Dmıtrı Mýn aıtty, dep habarlaıdy infohub.kz saıty.
Onyń aıtýynsha, jasandy ıntellekt shaǵyn jınaqty mektepterdegi oqýshylardyń jaýaptaryn taldap, bilimdegi olqylyqtardy anyqtaıdy. 2028 jyldyń shildesine qaraı jobany 2,5 myń shaǵyn jınaqty mektepke taratý josparlanýda.
Jasandy ıntellekt matematıka, sıfrlyq saýattylyq, qazaq jáne orys tilderi sabaqtarynda qoldanylady.
Oqý úderisi gıbrıdti sqema boıynsha qurylǵan: Astanadaǵy bilikti muǵalimder arnaıy jabdyqtalǵan stýdıadan onlaın rejımde sabaq ótkizedi, al aýyl muǵalimderi synypta sabaq barysyn súıemeldep, balalarǵa materıaldy meńgerýge kómektesedi. Oqýshylardyń belsendiligi men qatysýyn ınteraktıvti klıkerler men sıfrlyq quraldar arqyly baqylaıdy.
«Bul rette muǵalim synypta balalardyń janynda bolady, al jasandy ıntellekt oqýshylardyń jaýaptaryn taldap, bilimdegi olqylyqtar men álsiz tustardy tabýǵa jáne kimge qosymsha kómek kerek ekenin túsinýge kómektesedi. Iaǵnı biz derbestendirilgen bilim berýge kóshemiz», — dedi Q.AI basshysy.
Mýn jasandy ıntellekt muǵalimdi almastyrmaıdy, kerisinshe ony kúsheıtip, tıimdirek etedi dep qorytyndylady.
Buǵan deıin «Kýrsıv» Astanada qazaq-qytaı jasandy ıntellekt mektebi ashylýy múmkin ekenin jazǵan bolatyn.